Қоғамдық қауіпсіздіктің қырағы сақшысы

Жыл сайын елімізде маусым айын­да бірнеше сала мамандары төл мерекелерін атап өтеді. Со­лар­дың бірі ел тыныштығы мен қа­уіп­­сіздігінің сақшылары – полиция қызмет­керлерінің кәсіби ме­рекесі. Осыдан 24 жыл бұрын ҚР Тұңғыш Прези­дентінің Жарлығымен 23 маусым Қазақстан полициясы күні болып жарияланды. Содан бе­рі осы күні ел тыныштығының сақшы­ларына, тұрғындардың қауіп­сіз­дігін қамтамасыз етіп жүрген полиция қызметкерлеріне құрмет көр­сетіліп ке­леді.

Сырдария аудандық полиция бөлімінің әкімшілік полиция бө­лімшесінің әкімшілік практика тобының инспекторы Мақсат Ома­ров­тың қызметі әрі міндеті – адам өмірінің қауіпсіздігін қамта­масыз ету, келеңсіз оқиға орын алғанда сол жерге алғашқы болып жетіп, тергеп-тексеру амалдарын жүргізу, ел тыныштығын сақтауға үлес қо­су. Полиция инспекторы соңғы 16 жылдан бері қызмет барысында түрлі жағдаймен бетпе-бет ке­ліп, тез шешім қабылдау қабілеті мен біліктілігінің, тегеурінділігінің ар­қасында қызметін мінсіз атқарып келеді.

Отбасында әкесі Қадырқұлдың берген тәрбиесі мен анасы ардақты ұстаз Айткүлдің қамқорлығымен осы қиын да жауапты қызметті таң­дады. Заңгер мамандығын алған ол болашағын түбегейлі полиция қызметімен байланыстыруды мақ­сат етеді.

–Ер азаматқа тән маман­дықтың мәртебесі мен үшін әрдайым биік тұрады. «Тәртіпке бағынған құл болмайды» демекші, берілген пәрменді орындауға, заң аясында қызмет етуге мықты жігер мен біліктілік керек. Полиция қызметі – қиын әрі жауапты жұмыс. Қиын дейтінім, оқыс оқиға орын алғанда ауыр жағдайды көзіңмен көресің, жауапты болатыны – мәселен, жол-көлік оқиғасы болғанда тер­геп-тексеру кезінде қырағы болуың қажет. Адам тағдыры шешілетін­діктен, ұсақ-түйек болып көрінген жайға көп нәрсе байланысты бола­тындығы, – дейді полиция аға лейтенанты Мақсат Қадырқұлұлы.

Полицей өзінің міндетіне сәй­кес аудан аумағында Құмкөл кеніші, «Қызылорда-Жалағаш», «Шым­кент-Са­­ма­ра» тас жолы бо­­йында орын алған жол-көлік оқиғаларын тергеп-тексеріп, істі сотқа жолдайды. Тәуліктің кез келген уақытында жол-көлік оқиғасы болған жерге алдымен жететін де қырағы полицей.

Қазіргі кезде екінің бірі көлік айдайды. Тіпті, кей кезде жолда жүру ережесін білмейтін немесе кәмелет жасқа толмаған балалар көлік руліне отырып, жол-көлік оқиғасына ұшырайды. Сондайда полиция қызметкерінің біліктілігі сынға түседі. Кімдікі дұрыс, кімдікі бұрыс екенін дәлелдеу керек. Адамдардың ашуға салынатын кездерінде сал­қынқандылық таныту абыройлы іс екеніне ұзақ жылғы тәжірибесінде көзі жеткен. Сондықтан заң бар­шаға ортақ екенін, заң алдында жауапты екенін, әсіресе жолға шыққан жүргізуші еш уақытта естен шы­ғармағаны абзал.

– Заңнамаға сәйкес әкім­шілік айыппұлды өндіру, оны төлеу мін­детті екенін түсіндіреміз. Уақытылы төленбеген жағдайда сотқа жолданатынын ескертіп, азаматтарға егжей-тегжей айтамыз. Келеңсіз жағдай орын алғанда ешкім өзін кінәлі санамайды. Ал заңның құ­рығы ұзын екенін, айналып келгенде заң баршаға ортақ екенін түсіндіру біздің міндетіміз, – дейді полиция инспекторы М.Омаров.

Мамандығын мақтан ететін полиция инспекторы өзінің басты ұстанымы – антына адал болу, қыз­метін таза атқару, қандай қиын­шылық кездессе де шыдамды болу деп біледі. Шыны керек, бұл көптің қолынан келе бермейді. Күн сайын қызметке келгенде оның алдында заңдылықтың сақталуын қадағалау, қылмыстың алдын алу секілді жа­уапты міндеті тұрады. Қарбаласқа, қауырт тірлікке толы қызметте аса қырағылық пен табандылық танытып жүрген полиция инспекторы қызметтегі жауапкершілігінің зор еке­нін жақсы біледі.

Жүрегі «елім» деп соғатын, бей­біт заманда басын қауіпке тігіп, Отанға деген адалдығын бірінші кезекке қоятын полиция қызметкерінің әріптестері арасында да беделі биік.

Бүгінде Мақсат Омаровтың кеу­десінде «Мінсіз қызметі үшін» поли­циядағы 10 және 15 жылдық медалі жарқырайды. Сондай-ақ облыстық полиция департаменті, аудандық полиция бөлімі, аудан әкімінің «Алғыс хаты» – атқарған адал еңбе­гінің жемісі.

Жауапты қызметті мінсіз атқарып келе жатқан абыройлы азаматты кәсіби мерекесімен құттықтаймыз!

Бибісара ЖАНӘЛІ