Қарапайымдылығымен қадірлі болды

2004-2008 жылдары Сырдария ауданын басқа­рып, ауданның әлеуметтік-экономикалық дамуына өзіндік үлесімізді қосқан кезеңде ау­данның іскер азаматтарымен бірлесе еңбек еттік. Өзінің білім­ділігімен, біліктілігімен, пара­саттылығымен, қарапайым­дылы­ғымен ерек­шеленетін Асылбек Әбдуов ауданның құры­лыс саласында жұмыс істеді.

2005 жылы ауданда жүргізілген ең ма­ңызды жұ­мыс қыс айларында орын алатын су тасқынының алдын алу үшін «Қараөзек» ар­насының құрылысының түбегейлі шешілуі еді. Егіннің арқасында несібесін еселеп отырған сырдариялықтар үшін бұл жақсы жаңалық болды. Осы жұмыстың сапалы атқарылуын аудан әкім­дігі, аудандық құрылыс бөлімі мен ау­дандағы құры­лыс саласының мамандары бақылап, нәтижелі аяқ­талуына атсалысты. Асылбек те бізбен бірге еңбек етті.

Аудандық әуез мектебіне жаңа ғимарат керек болып, жиналыс өткізіп, мәселені талқыладық. Сол кезде жартысы пайдаланылмай, тозып тұрған ескі редакция ғимаратын қайта жөндеп, жабдықтау жөнінде шешімге келдік. Бұл іске құрылысшылармен бірге Асекең де белсене араласты, сөйтіп әуез мектебі жаңа ғимаратта жұмысын жалғастырды. Көп өтпей кенттің не­гізгі көшесінің бойынан аудандық газет редакциясына да ғимарат салынды. Ғимараттың ашылуын салтанатты түрде ұйымдастырдық. Құрылысты Асекең аудандық мәслихат депутаты ретінде демеушілікпен атқарды.

Құрылыс саласының майталманы кейін мем­лекет­тік қызметке келіп, аудандық құрылыс бөлімін басқар­ды. Қарапайымдылығымен үл­кенге де, кішіге де қадір­лі болды. Енді ғана бейнетінің зейнетін көрер тұтса өмірден өткені болмаса Асекең артына жақсы іс, өнегелі із қалдырды. «Қазақстанның құрметті құрылыс­шысы» атануы да оның талай жылғы еңбегінің жемісі. Абыройлы азамат біздің жадымызда жақсы кадр, сенімді әріптес болып қала береді.

Асекеңнің өзі сондай кеңпейілді болса, дас­тарханы да өте берекелі еді. Ерлері аттан, қазаны оттан түспеген шаңырақ елге белгілі азаматтарға құшағын кеңінен жая білді. Елге белгілі Хасанғалиевтер, Нұрсейітовтер отбасымен құда болып, үлгілі, абыройы биік әулетке айналды. Сол биік аласармайды деп сенемін.

Ибрагим ӘБИБУЛЛАЕВ,

2004-2008 жылдардағы

Сырдария ауданының әкімі