Үй жануарларын қараусыз қалдырмау керек

Сырдария ауданына қарасты елді мекендерде ауыл шаруашылығы жануарлары және ит-мысықтарды асырау қағидалары Қызылорда облыстық мәслихатының 2018 жылғы 29 наурыздағы №195, 196 шешімдерімен бекітілген. Бұл ретте ауыл шаруашылығы жануарларын және ит-мысықтарды асырау кезінде аталған қағиданың талаптары бұзылған жағдайда азаматтарға ҚР Әкімшілік құқық бұзушылық туралы Кодексінің (Бұдан әрі – Кодекс) 408-бабымен әкімшілік шара қолданылатынын ескерген жөн.

Ит-мысықтарды серуендету кезінде олардың тарапынан адам өміріне қауіп төндіруіне жол бермеу және ауыл шаруашылығы жануарларының қатысуымен жол-көлік оқиғаларын болдырмау мақсатында облыс көлемінде «Ит-мысық және ауыл шаруашылығы жануарларының асырау қағидаларын сақтау» жедел профилактикалық іс шарасын өткізу үшін аудандық полиция бөлімі арнайы жоспар бекіткен.

Арнайы жоспарға сәйкес, іс-шара барысы жеке құрамға таныстырылды. Өз кезегінде аудандық полиция бөлімінің Жергілікті полиция қызметі бөлімшесінің учаскелік полиция инспекторлары жергілікті халыққа түсіндірме жұмысын жүргізуде. Ит-мысықтардың иелері тарапынан асырау қағидаларын бұзу деректері анықталған жағдайда оларға қатысты Кодекстің 408-бабымен әкімшілік хаттама рәсімделеді.