Cырдың іскер қызы
«Туған жердің жері де көрікті, елі де сүйікті» деп бекер айтылмаса керек-ті. Ақиқатында, тамыры тереңнен тартқан қасиетті ауыл топырағынан талай перзент түлеп ұшты. Ұлттық санаға сілкініс жасаған Елбасы Нұрсұлтан Назарбаевтың «Болашаққа бағдар: рухани жаңғыру» бағдарламасы шеңберінде тұлғалар есімі қайта жаңғырып келеді. Тарихы сан тарауға тармақталған Тереңөзек нағыз таланттар өлкесіне айналды. Бүгін біз туған жерге туын тігіп, өз кәсібін жандандырған Сырдың іскер қызы жайлы қалам тербемекпіз.Осыдан жиырма жылға жуық уақыт бұрын Манат Алмашева бизнестің қыр-сырын меңгеруге бел буады. Болашағын әріден ойлаған кәсіпкер қолда бар қаржысын әлеуеті зор шаруаға жұмсайды. С.Асфендияров атындағы Алматы мемлекеттік медициналық институтының Шымкент қаласындағы филиалындағы «Фармация» факультетін провизор мамандығы бойынша тәмамдаған маман дәріхана бизнесін жандандыруды қолға алады. Негізінен тереңөзектік Манат Тамабайқызы 1989-2001 жылдар аралығында Тереңөзек кентінде орналасқан №7 орталық дәріханада провизор-технолог, провизор-аналитик, менгерушісінің орынбасары қызметтерін абыроймен атқарады.
Он жылдан аса уақытта дәріхана саласында мол тәжірибе жинаған ол дәрі-дәрмекпен халықты қамтамасыз ете бастайды. Жеке кәсіпкердің алғашқы дәріханасы Қызылорда қаласындағы «Сәулет» мөлтек ауданында ашылған. Содан бері күні-түні шағын бизнесті кеңейту үшін Манат Тамабайқызы барын салады. 2006 жылы қайта ашылған «Ансар М» ЖШС құрамында 15 дәріханалар желісі халыққа қызмет көрсетуде. Бүгінде қала орталығымен қатар, Тереңөзек, Жалағаш, Шиелі, Жаңақорған, Қармақшы аудандарында дәріхана қызметі оңтайлы үйлестірілуде.
Барлық дәріхана желісін дер кезінде дәрі-дәрмекпен қамтамасыз ету мақсатында 2018 жылы Қызылорда қаласында халықаралық стандартқа сай (GDP-Good Distribution Praktic) дәрі-дәрмек қоймасы мен «Lab Service compani» ЖШС офисінің арнайы ғимараты салынған. Қазіргі таңда облыс орталығында орналасқан 4 дәріхана халықаралық стандартқа сай (GPP) ережесін орындаса, Тереңөзек және Жалағаш ауданындағы дәріханалар сынақтан өтуге дайындық үстінде.
Сырдария ауданының тумасы Манат Алмашева әлемді дүрбелеңге салған пандемиямен күресте халыққа қол ұшын беруде. Тәжірибелі, іскер басшы сындарлы сәтте дәрі тапшылығын болдырмау мақсатында тиісті шараларды қолға алды. Коронавирус инфекциясына қарсы дәрі-дәрмек қорына бақылау жасап, қиындықты еңсеруге күш салып келеді. Сонымен бірге эпидемиологиялық ахуалды тұрақтандыру бағытында медициналық құрал-жабдықтармен қамтамасыз етуде.
Манат Алмашева облыс көлемінде кәсіпкерлік саласының дамуына зор үлес қосып келеді. 2018 жылы Қазақстан кәсіпкер әйелдері ассоциациясы Қызылорда облысы филиалының директоры болып сайланды. Сондай-ақ «Атамекен» Ұлттық кәсіпкерлер палатасының Қызылорда филиалының өңірлік кеңесінің мүшесі.
Жүзге жуық қызметкері бар компания тарапынан мұқтаж жандарға қайырымдылық жасалып келеді. Облыс және республика көлемінде жоғарғы марапатқа ие болған Манат Тамабайқызы – екі перзенттің анасы. Осы күні қос перзенті отбасылық бизнесті өркендету үшін анасына қолғабыс етуде.
Айта кету керек, кәсіпкер қысылтаяң кезеңде туған жеріне көмек көрсетуде. Дәріханалар желісін қажетті дәрі-дәрмекпен қамтамасыз етуге өз үлесін қосуда. Осындай сындарлы сәтте дәріханалардың жұмысын үйлестіре білген Манат Тамабайқызы өз тәжірибесіне сүйенеді. Біз де белсенді кәсіпкердің алдағы қызметіне сәттілік тілейміз.
Балтабай ОРДАБЕКОВ
