Халық сүйіспеншілігіне бөленген

Кенттің Серікбай Жәкеев көшесі маған ерекше ыстық. Өйткені бал дәурен балалығым мен жастық шағым осында өтті. Бұл көшенің көңілімнің түкпірінен орын алғаны сондай, о дүниелік болған ата-анамның көзіндей көремін. Сол жермен жүрсем, қымбат асылдарым алдымнан шыға келетіндей сезімде боламын.

Бұрын бұл көше пролетариат көсемі Карл Маркс атында еді. Еліміз Тәуелсіздік алғаннан кейін көшеге Серікбай Жә­кеевтің есімі берілді. Бұл азаматтың кім болғанын жас ұрпақ білуге тиіс.

Серікбай Жәкеев ішкі істер органында қызмет жасап, жау­­лармен күресте ерлікпен қаза тапқан. Бұл өткен ғасырдың отызыншы жылдары болған оқиға. Серікбай Жәкеев сенімді серігі Жылқыбай Құттыбаевпен бірге ерлігімен және батылдығымен халық сүйіспеншілігіне бөленген. Жаулары қос арыс­ты аңдып жүріп, мерт еткен. Бірі 24 жасында, екіншісі 20 жасында қыршын кеткен.

Есіл ерлерге аудан орталығындағы саябақта жастардың қолдауымен 1967 жылы ескерткіш қырлы тас салынған. Ескерткіштің биіктігі 6 метр, оның тұғыры бетоннан құйылған. Тұғырының үстіне металдан жасалған пирамида тәріздес қырлы тас орнатылған. Аудан жастарының мәдени шаралары осы ескерткіш маңында ұйымдастырылады. Қазақстан Қарулы Күштері қатарына аза­маттық борышын өтеушілер де ес­­­­­­керткішке тағзым етуді дағдыға айнал­дырған. Ескерткіш кент әкімдігімен және №36 Ә.Тәжібаев атындағы мектеп-лицей оқушыларының күтіміне алынған.

Сондай-ақ С.Жәкеев көшесі биыл құрылғанына ғасыр толып жат­қан ау­данның білім ордаларының қара ша­ңырағы №35 И.Тоқтыбаев атындағы мектеп-лицейге жақын орналасқан. Бұл көше Ұлы Жеңістің 50 жылдығы және Жылқыбай Құттыбаев атындағы көшемен қиы­лы­сады. С.Жәкеев атындағы көшеде Сырдария ауданының Құрметті азаматтары Хайролла Әбенұлы, Сергей Тоқсанбаев секілді ардагерлер тұрады.

Шаһарбек НҰРСЕЙІТОВ