Бекітілетін тариф бағасы талқыланды
ҚР Ұлттық экономика министрлігінің Табиғи монополияларды реттеу комитетінің Қызылорда облысы бойынша департаменті мен «Нұра топтық су құбыры» шаруашылық жүргізу құқығындағы РМК «Арал» СЖКБД филиалы жария тыңдау өткізді. Жиынға мекеме өкілдері, аудандық мәслихат депутаты, кент және ауыл әкімдері, аудан тұрғындары қатысты.Жария тыңдау ашықтық пен жариялылықты қамтамасыз ету мақсатында әлеуметтік желі арқылы тікелей эфирде де жүргізілді. Департамент басшысының орынбасары Ғ.Тойлыбек суды магистральдық құбыр жолдары, таратушы желілер арқылы беру және сарқынды суды бұру қызметтеріне байланысты бекітілетін тариф жобасын талқылау мақсатында жиналыс ұйымдастырылып отырғанын жеткізді. Мұнан соң «Арал» СЖКБД филиал директорының орынбасары Е.Қуандықов баяндама жасады. Ол мекеменің атқаратын жұмыстарын, шығындар көлемін және алдағы жоспарлар туралы айтып өтті. Атап айтқанда, 1 текше метрге қосымша құн салығынсыз суды магистральдық құбыр жолдары қызметіне 956,74 теңге, таратушы желілер арқылы беруге 871,89 теңге, сондай-ақ сарқынды суды бұруға 764,88 теңге ұсынылғанын жеткізді. Бұл қызметтер бойынша өтінім департаментке 11 мамырда түскен және тиісті қағидаға сәйкес өтінім 30 күн ішінде қаралады.
– Департамент қазіргі таңда қолданыстағы нормативтік-актілерге сәйкес филиалдың тариф бекітуге қатысты ұсынымын қарауда. Құжаттар бойынша нақтырақ айтсақ, шикізат және матриалдар, жанар-жағар май, энергия, жалақы, әлеуметтік салық, ағымдағы жөндеу баптары бойынша түзетпелер қарастырылуда. Түпкілікті шешім бүгін айтылатын ұсыныстар бойынша 22 шілдеде қабылданады, – деді департамент басшысының орынбасары Ғ.Тойлыбек.
Өз кезегінде аудан ардагерлері Т.Сүлейменов, З.Жүсіпбаев, ауыл әкімдері Ғ.Алданазаров, Б.Қыдырбаев, «AMANAT» партиясы аудандық филиалының кеңесшісі Б.Ахметов тариф бағасын бекітуде халықтың тұрмысын ескеру, жұмыс сапасын арттыру бағытында бірқатар ұсыныс айтты.
Ақтөре ИБРАГИМҰЛЫ
