Даңқы көкке өрлеген ақын

Заманының заңғар ақыны Мұқағали Мақатаевты еске алу мақсатында Тереңөзек кенті мәдениет үйінде аудан­дық білім бөлімі мен №210 O.Әбілпаттаев атындағы орта мек­тептің ұйымдастыруымен «Мұқағали – мәңгілік жыр» тақырыбында әдеби-танымдық кеш өткізілді. Іс-шараға аудандық білім бөлімінің әдіскері Қаракөз Қалжанова, №210 O.Әбілпаттаев атындағы орта мектеп директорының оқу ісі жөніндегі орынбасары Айгүл Жаңабергенова, тәрбие ісі жөнін­дегі орынбасары Айгүл Друмова, ұстаздар мен оқушылар қатысты.

Қазақ қаламгерлерінің ішінде Мұқағали Мақатаевтың поэзияда алатын орны ерекше. Мектеп оқушылары ақиық ақынның шығар­машылығын көпшілікке кеңінен насихаттай білді. Поэзия мұзбалағының сан алуан тақырыпта жазылған өлеңдерін жастар жатқа оқыды. Сонымен бірге лири­калық өлеңдері желісінде арнайы қойылым көпшілік назарына ұсынылды. Жас әнші Динара Жәкешова ақынның сөзіне жазылған «Есіңе мені алғайсың» әнін әуелете шырқады. Өзге де мектеп оқушылары ерекше туындыларды орындап, көптің есінде қалды.

– Бүгін керемет кештің куәсі атан­дық. Өнерімен тәнті еткен жас­тар ақын Мұқағали Мақатаевтың шығар­машы­лығына тереңнен қанықты деп ойлай­мын. Әрбір қаузаған тақырыбын жан-жақты аша білген олардың шығар­­машылық қабілеті зор. Әрине, қазақ руханиятының қайнар бұлағын қалып­тастыра білген ақынның өлеңдері адам жүрегіне жақын. Қашанда жас ұрпақ ақын­ның мол мұрасын барынша ұғынып, өлең­нің құдіретін сезіне білуі керек, – деді аудандық білім бөлімінің әдіскері Қаракөз Қалжанова.

Жасындай ғұмырында жарқылдаған мұз­балақ ақынның поэзиясы мәңгілік өш­пейді. Ізінен ерген келер ұрпақ ақын есімін жаңғырта бермек.

Б.АЯБЕКҰЛЫ