Еңсесі биік Елорда
Астана күні – барша қазақстандықтар үшін мерейлі мереке. Бүгінде еліміздің жүрегі атанған елорда — армандар орындалатын, зор мүмкіндіктерге қол жеткізетін қала, деп хабарлайды Сыр бойы.Бүгін Қызылорда қаласындағы Тұңғыш Президент саябағында еліміздің бас қаласы — Астананың 25 жылдық мерейтойына арналған “Еңсесі биік елорда” атты мерекелік іс-шара өтті. Шараға облыс әкімі аппаратының басшысы Шахмардан Байманов қатысып, Сыр жұртшылығын мерейлі мерекемен құттықтады.
Астана – бірлік пен берекенің, Отанымыздың толағай табыстарының символы, халқымыз қол жеткізген шексіз мүмкіндіктердің үлгісі. Өздеріңізге белгілі, алты Алаштың анасы – Сыр өңірі де төрт астананың төрі болған қасиетті мекен. Ұлы дала астаналарының көшін жалғап, игі шараға жиналған қауым Астана қаласына қатысты қызықты сұрақтарға жауап беріп, іс-шараға белсене қатысты. Мереке одан әрі концертпен жалғасты.
Айта кетейік, Астана күніне орай қала және барлық ауданда мәдени-көпшілік іс-шаралар мен танымдық кездесулер өткізілуде.
