Бірнеше жүлде қоржында
Әр жыл сайын дәстүрлі түрде өтіп, өнерлі өрендердің бағын сынайтын «Бозторғай» халықаралық өнер жарысы жоғары деңгейде ұйымдастырылып келеді. Алатау бөктерінде өткен кезекті байқауға Сырдария ауданының өнерпаз өрендері де қатысып, жүлделі орындарға қол жеткізді.Алматы қаласында 1-5 маусым аралығында өткен балалар шығармашылығына арналған «Бозторғай» халықаралық конкурсының қорытындылары біздің жерлестерімізді сүйіншіледі. Қорытынды нәтижелерге сүйенеск, аудан өнерпаздары әр түрлі жанр бойынша бірнеше жүлдені қанжығаға байлады. Конкурсқа Белорусь, Латвия, Өзбекстан, Болгария, Украина, Тәжікстан, Қырғызстан және Қазақстан Республикасынан 1100-ден аса жеке орындаушылар мен аспаптық ансамбльдер және би ұжымдары, ән, би, терме, күй жанрлары бойынша үздіктер қатысты.
Қазылар алқасының құрамында Қазақстан Республикасының атынан Қазақстанның Халық әртістері Нағима Есқалиева, Лаки Кесоглу, ҚР Еңбек сіңірген қайраткерлері Айгүл Үлкенбаева, Рамазан Стамғазиев, Әлішер Каримов, композитор Бейбіт Оралұлы және де өзге мемлекеттерден арнайы шақыртылған әділ қазы алқалары төрағалық жасады. Сонымен қатар бақ сынаушыларға Литва, Болгария, Ресей, Армения елдерінің атақты өнерпаздары да төрелік етті.
Қазақстандықтар арасында Сыр елінен қатысқан бірнеше өнерпаз облыс, аудан атын әлемдік байқауда асқақтатты. Оның ішінде Сырдария ауданының өнер мектебінің атынан қатысқан Дінмұхамед Алмасұлы күй жанры бойынша бас жүлдені иеленді. Бұған дейін де жетекшісі Абылайхан Қилымхановпен бірлесе жұмыс жасай отырып, талай биікті бағындырған өнерпаз халықаралық байқауда Кетбұғаның «Ақсақ құлан» және М.Әубәкіровтің «Өрлеу» күйлерін орындаған.
Одан кейін бір ғана Аманкелді ауылдық округінен қатысқан өнерпаздарының өзі бірнеше орынды иеленіп, үкілеген үмітті ақтады. Оның ішінде Қожаберген Дайырхановтың жетекшілігімен қатысқан Диас Берлібек лауреат атанса, 14-17 жас аралығында ән жанры бойынша Батыржан Амангелдиев бірінші орынды жеңіп алды. Хореография жанры бойынша 11-13 жас аралығында бақ сынаған «Балдәурен» би тобы бірінші орынды қанжығаға байлады. Би тобына Гүлсім Иманбердиева жетекшілік еткен. Ал Шаған ауылынан қатысып, бас жүлдені жеңіп алған «ЕркеНаз» би тобының жетекшісі – Мөлдір Бекарыстанова. Жеке аспапта ойнау жанры бойынша Ғазиз Жұбановтың жетекшілігімен 14-17 жас аралығында Батыржан Аманкелдиев үшінші орынды және жеңіп алған.– Ауылдың өнерлі өрендерімен Алматы шаһарына барып, халықаралық байқауға қатысып қайттық. Өнерпаздар керемет өнер көрсетті. Киелі сахнада ән шырқап, би биледі. Қазақтың дүлдүл өнер иелері балалардың дайындығына ризашылықтарын білдірді. Алдағы уақытта өнерпаздар көптеген байқауларда бақ сынайтын болады. Өнер фестиваліне қатысуға қолдау білдірген демеушілерге алғыс айтамыз, – дейді Аманкелді ауылдық мәдениет үйінің директоры Гүлайна Нартайқызы.
Сыр елінің атын, туған жер Сырдария ауданын әлемге танытар өнерпаздарымыз қанаттары талмай, биікке самғай берсін! Өнерлі бүлдіршіндердің келешегі кемел, болашағы жарқын болсын дегіміз келеді.
Назым ӘБІЛХАЙ,
Қорқыт ата атындағы
Қызылорда университеті
журналистика факультетінің
1-курс студенті
