Сырдариялықтар жүлдегерлер қатарында

Облыстық ха­лық шығар­ма­шылығын дамыту және мә­дени-продюсерлік орта­лы­ғы­ның ұйымдастыруымен ба­лалар мен жасөспірім­дер шығар­ма­шылығының ХХІІ «Бозторғай» онлай­н байқауы өткізілді. Облыс­тық байқауға аудан­дық мә­­дениет үйі мен әуез мек­тебінің өнерпаздары қа­тысты.

Облыстық байқаудың мақсаты – жас өнерпаздардың шығармашылығын дамытып, олардың музыкалық кәсібилігін шыңдау, балалардың жазғы демалысын тиімді пайдалану болып табылады. Негізінен онлайн байқау халықтық орындау, вокал, хореография, аспапта орындау жанрларын қамтыды. Музыкалық өнердің жас таланттарын анықтауға арналған байқау барысында сырдариялық өнерпаздар жүлдегерлер қатарынан көрінді. Хореография жанры бойынша жүлделі І орынды шіркейлілік «Шаттық» би тобы, ІІ орынды шағандық «Сыр гүлі» би тобы иеленді. Ал вокал жанрында бақтарын сынаған аманкелділік Жанерке Науан бас жүлдені, Сәулет Қайып ІІ орынды иемденді. Халықтық орындау жанрында өз шеберлігімен тереңөзектік Әйгерім Үсенова ІІІ орынды еншіледі. Аспапта орындау жанры бойынша асқарлық Еркежан Кеңесбайқызы бас жүлдені, ІІ орынды аманкелділік Закир Советұлы жеңіп алды.

Дәстүрлі түрде өткізілетін байқау бірнеше жас таланттың бағын ашты. Үлкен сахнада өнер көрсетіп, жарық жұлдызға айналған талай өнерпаз «Бозторғай» байқауынан қанат қақ­қан. Жалпы алғанда музыканың сан түрлі бағытын меңгерген дарынды өнер­паздардың болашағы зор.

Әлемдік пандемияның салдарынан балалардың жазғы демалысын ұйым­дастыруға шектеу қойылған. Дегенмен, балалардың кәсіби тұрғыдан шыңдалып, музықалық білімін жетілдіру үшін «Бозторғай» байқауының маңыздылығы жоғары. Аталған байқауда отыздан аса сырдариялық өнер көрсеткенімен, оның ішінен жоғарыда аталған өнерпаздар ғана үздік атанды. Байқауға дайындаған шы­ғармалары қазылар алқасы тарапынан жоғарғы бағаға ие болды.

Айта кету керек, байқау жеңімпаздары мен жүлдегерлері карантин талаптарына сай онлайн режимде марапатталды. Жас өнерпаздарға арнайы диплом табыс етілді.

Балтабай ОРДАБЕКОВ