Отбасылық ансамбль биік тұғырда

Жыл сайын Қазалы ауданында Роза Бағланова атындағы аудандық мәдениет үйінде қобызшы, музыканттар Махамбет және Раманқұл Әуезовтердің атындағы «Қастерлеп жүрсін өнеріңді ұрпағың!» атты дәстүрлі облыстық халықтық отбасылық ансамбльдердің байқауы өтеді. Биыл байқау республикалық деңгейде ұйымдастырылды.

Республика бойынша өнер байқауына жеті халықтық атағы бар отбасылық ансамбльдер қа­тысып, бақ сынады. Ақтөбе облысынан екі ансамбль, Атыраудан, Тараздан бір-бірден және Қызылорда облысынан Арал, Шиелі, Сырдария ауданынан үш ансамбль өнер көрсеткен бай­­қауға Сырдария ауданынан Сәдуақасовтар халықтық от­ба­сылық ансамблі қатысты. Есі­­мі республикаға белгілі Сандыбай Сәдуақасов басқаратын «Сәдуақасовтар» отбасылық ан­­самблі өнер додасында үздік өнер көрсетіп, бірінші орынды жеңіп алды. Сырдариялық ансамбль байқау шарты бойынша Шал Мырзаның күйі «Мереке», Тәңірберген Қалауовтың «Қы­зылорда вальсі», жеке да­уыста Жандос Сансызбаев, Тама­риннің «Музыкальный привет», халық әні «Харарау», жеке дауыс­та Аружан Сәдуақасова, Бақты­байд­ың «Әуен» күйін, жалпы бес шығар­маны орындады.

– Жыл сайын отбасымызбен дәстүрлі түрде өтетін байқау­ға қатысып, өнер көрсе­теміз. Бұл – бір жағынан, шығарма­шылық із­деніске есеп берудің көрі­нісі болса, екінші жағынан, өнер десе іш­кен асын жерге қоятын, ән мен күйге ерекше сүйсінетін, ба­ғалайтын тындарманда­рымыз­ға қуаныш сыйлау. Отбасымызда жұбайымнан бастап, балаларым, немерелерімнің барлығы өнерлі, музыкалық қабілетімен қатар арнайы білімдері де бар музыканттар, түрлі аспаптарда ойнайды. Келіндерім де басқа салада еңбек етсе де, өнерге жақын жандар. Міне, біздің халықтық отбасылық ансамбльдің өнеріне жоғары ба­ға берген Қазалы жұртына айтар алғысымыз мол. Өнер бар жерде адам ешуақытта рухани аласармайды. Алдағы уақытта да осындай байқауларға қатысып, өнерімізді тамашалайтын боласыздар, – дейді халықтық отба­сылық ансамбльдің жетекшісі әрі Сәдуақасовтар отбасының отағасы Сандыбай Сәдуақасов.

Айта кету керек, дәстүрлі облыс­тық халықтық отба­сылық ансамбльдер байқауында Сыр­да­риялық Сә­дуа­қасовтар от­ба­­сы­лық ансамблі үздік өнер көр­­се­тіп, екі мәрте бас жүлдені жеңіп ал­ған болатын.

Бибісара ЖАНӘЛІ