Қаламгерге құрмет
Аудандағы Берекелі Бесарық ауылын айтқанда осы өлкеден шыққан дарынды ақын-жазушы, қаламгерлердің есімі бірден ойға оралады. Оның қатарында өлке тарихын зерттеп, тарихты жасаған тұлғалар туралы қалам тербеп жүрген Жұмабай Байзақұлы бар. Қарымды қаламгердің аудан, тіпті өңір, республиканың рухани-мәдени дамуына қосып жүрген үлесі көп.Бесарық ауылдық мәдениет үйінде Қазақстан Журналистер Одағының, Халықаралық Жазушылар Одағының мүшесі Әубәкір Жұмабай Байзақұлымен «Ер мен елдің сырын шерткен қаламгер» атты кездесу кеші өтті. Танымдық кеш өлкетанушының өмірі мен шығармашылығына арналды.
Іс-шараның басында Жұмабай Байзақұлының өміріне арналған бейнебаян ұсынылды. Онда қаламгердің туып-өскен жері, атқарған қызметтері мен ауданның рухани-мәдени дамуына қосып жүрген үлесі көрсетілді.
Мұнан соң аудандық мәдениет және спорт бөлімінің басшысы Жігер Айекешов сөз сөйлеп, кеш иесін құттықтады.
– Жұмабай Байзақұлының еңбектері Сыр тарихынан сыр шертеді. Өңір тарихын зерттеп-зерделеген ардақты азаматтың көпшілікке, кейінгі толқынға берері мол. Жергілікті қаламгер – туған жер, өскен орта, перзенттік парыз туралы оннан аса кітаптың авторы. Өлкетанушы осы жерде туып, сан қилы болған тағдыр иелерінің жоқтаушысы десек те қателеспейміз. Бұл кісінің аудан мәдениетінің дамуына атқарып жүрген үлесі зор. Кеш иесіне шығармашылық табыс тілейміз, – деген аудандық мәдениет және спорт бөлімінің басшысы өлкетанушыны аудан әкімінің алғыс хатымен марапаттады.
Кітапхана ұйытқы болған іс-шарада қаламгер түрлі сауалдарға жауап берді. Алдымен өзін бағып-қағып, жетілдірген ата-анасы туралы айтты. Баспадан шыққан көптеген кітаптардың ішінде «Ақ жол» кітабын әкеге деген сағыныш ретінде жазған. Одан соң берекелі болған Бесарық ауылындағы қызмет еткен жылдар жайлы әңгіме өрбіді. Елге қызмет ете жүріп, еліміздің егемендігін алған тұста Бесарық ауылының кеңестік «киімінен» ажырап, өзінің тарихи атауын иеленуіне зор еңбек сіңірген. Одан қалды осы өлкенің сайы мен қырқасын аралап, арнайы зерттеп, қағаз бетіне түсірді, оны туынды ретінде баспадан шығарып, кейінгі толқынға ұсына білді.
Осы уақытқа дейін Жұмабай Байзақұлының 12 кітабы жарық көрді. Олардың қатарында 2020 жылы жарыққа шыққан «Бесарықтан Берлинге дейін» кітабын ерекше атап өтуге болады. Бұл кітапта Бесарық ауылының негізін құрайтын ауылдардан соғысқа аттанып, ұрыс даласында қалған 174 боздақ пен елге аман-есен оралып, ел еңсесін тіктеуге атсалысқан кешегі майдангерлердің өмірі мен атқарған қызметі жинақталған. Олардың кейінге үлгі боларлық өнегелері кітап арқауы болған. Осындай еңбектерімен ол Қазақстан Журналистер Одағының, Халықаралық Жазушылар Одағының мүшесі атанды.
Кездесу кешіне Қармақшы ауданының Құрметті азаматы Серік Ыдырысов, Қазақстан Жазушылар Одағынығының мүшесі, ақын Елубай Әуезов, қоғалыкөлдік ақын Байрон Есенбаев құрметті мейман болды. Олар кеш иесінің тарихты түгендеуге қатысты атқарып жүрген елеулі жұмыстарын атап көрсетті. Қаламгердің тұлғалар жайлы туындыларына тоқталды. Ауыл десе ішкен асын жерге қоятын жергілікті қаламгер жылт еткен жаңалықтарды аудандық, облыстық басылымдарға тұжырымды етіп беруге асығатынын, оның қаламынан шыққан туындылардың өзектілігі мен маңызы зор екенін тілге тиек етті. Арнау өлеңдерін де оқыды.
Өз кезегінде №147 орта мектеп директоры Ғалым Муталов құттықтау сөз сөйлесе, мектептің қазақ тілі әдебиеті пәнінің мұғалімі, ақын Шынар Әбжекенова қаламгердің шығармаларын таныстырды. «Бесарық бастауы» (1992), «Берекелі Бесарық» (2004), «Берекелі-мерекелі Бесарық» (2011) кітабы ел тарихынан сыр шертетіні айтылды.
Қарымды қаламгер дарынды оқушылардың «Зерде» байқауының жұмысына жетекшілік жасайды. Сол байқауда жетістікке жеткен шәкірттері ұстаз мерейін үстем етті. №147 орта мектеп ұстаздары Мөлдір Полатова мен Зарина Секеева өлкетанушының бастамасымен ғылыми жоба қорғаған шәкірттері жайлы айтты. Сол арқылы оқушылар жетістікке жетіп жүргенін жеткізді.
Кеш барысында Бесарық ауылдық мәдениет үйінің директоры Абзал Молдашев бастаған өнерпаздар, облыстық филармониясының әншісі Мағжан Аманжолов және өлкетанушының немерелері әннен шашу шашып, өнер көрсетті.
Осындай кештің ұйымдастырылғанына Жұмабай Байзақұлы ризашылығын білдірді және алдағы уақытта да ел тарихын түгендеу бағытында қалам тербей беретінін айтты.
Ердос СӘРСЕНБЕКҰЛЫ
