Жеті өнерпаз жеңімпаз
Биылғы «Балалар жылы» аясында талантты өрендер өнерін барынша шыңдай түсті. «Сыр елі – жыр елі» атанған өңірдің әрбір өнерпазы «Шын мықтыға тұсау жоқтығын» осы жылы да дәлелдеді. Осы ретте, жақында Қызылорда қаласындағы Асқар Тоқмағамбетов атындағы мәдениет үйінде VI республикалық «Жібек жолы» байқауы өтті. Онда сырдариялық жастар өнер көрсетіп, талантымен көпшілікті тәнті етті. Соған сай, республикалық байқаудың жеңімпаздар қатарынан көрінді.Бірнеше жанрды қамтыған республикалық байқауда «Сұлу-ай» шығармашылық өнер орталығының шәкірттері бақ сынады. Әрине, «Өнер – таусылмас азық, жұтамас байлық» екенін жақсы білеміз. Кішкентайынан өнерге ынтық болған балғындар сахнаның киесін тереңнен ұғынады. Негізінен, VI республикалық «Жібек жолы» байқауында өнер орталығының оқушылары «Аспапта орындау» және «Эстрадалық вокал» жанрында сынға түсті. Өз өнерімен тәнті еткен сырдариялық өнерпаздар жеңімпаз атанды.
– VI республикалық «Жібек жолы» байқауына «Сұлу-ай» шығырмашылық өнер орталығының оқушылары қатысып, мол тәжірибе жинақтай түсті. Жуырда 1 жылдығын атап өтетін орталықта өнерге шын берілген жандар жиналған. Әрқашан «Өнерлі өрге жүзер» деген тәмсілді естен шығармаймын. Жүрегі өнер деп соққан балғындарды әрдайым қолдауға дайынбыз. Бүгінгі байқауда әрбір өнерпаз үкілеген үмітті ақтады. Тәулік бойы олардың жақсы өнер көрсетуіне тілектестік білдірдік. Алдағы уақытта өнер орталығының демеушілігімен жоғары деңгейдегі байқауларда біздің мақтаныштарымыз өнер көрсететін болады, – дейді «Сұлу-ай» шығармашылық өнер орталығының құрылтайшысы Анар Қалдыбаева.
Жалпы, аспапта орындау жанры бойынша Әбдімомын Желдібаевтың күйі «Еркесылқымды» жиналған жұртшылыққа ұсынған айдарлылық Дәулетхан Көзейбай республикалық байқауда бас жүлдені жеңіп алды. Аталған жанрда мықтылық танытқан А.Тоқмағамбетов ауылының өнерпазы Ақәділ Пернебаев Дина Нұрпейісованың «Тойбастар» күйін, Еркежан Кеңесбайқызы Қазанғап Тілепбергенұлының «Шынаяқ тастар» шығармасын орындаған болатын. Қос күйші жүлделі І орынды иеленді. Сондай-ақ нағилық Нұршат Ешмұратова Құрманғазы Сағырбайұлының «Балбырауын» күйін көрермен назарына ерекше жеткізіп, І орынды иемденді. Ал Дәулеткерей Шығайұлының «Қосалқа» күйімен Абат Бегайдаров ІІ орынды қанжығасына байлады.
Өз кезегінде «Дәстүрлі ән» жанры бойынша Бәкір Тәжібаевтің «Ақ Бұлақ» әнін нақышына келтіріп шырқаған шіркейлілік Елнұр Сайлаубек бас жүлдеге қол жеткізді. Жеті нотаны жетік меңгерген асқарлық жас әнші Дінмұхамбет Сансызбай эстрадалық вокал жанрында ІІ орынға табан тіреді.
Айта кетейік, айтулы байқауға шәкірттерін жан-жақты дайындаған ұстаздар Роза Дурманова, Гүлназ Сералиева, Ботакөз Қалиасқарова, Мақсұт Әбсадықов, Әсел Ыбраева «Үздік жетекші» номинациясымен марапатталды. Барлық жеңімпаз бен жүлдегерге арнайы диплом мен кубок, медаль табысталды. Сонымен бірге бірқатар өнерпазға Алматы қаласында өтетін республикалық байқауға тегін жолдама берілді.
Балтабай АЯБЕКҰЛЫ
