Тіршілік тынысы Tirshilik-tynysy.kz ақпараттық агенттігі
» » » Ұлт ұстазын ұлықтады

Ұлт ұстазын ұлықтады

Көрнекті қоғам қайраткері, ұлт ұстазы Ахмет Байтұрсын­ұлы­ның 150 жылдығы кең көлемде аталып өтілуде. Ауқымды іс-шаралар, кездесулер мен танымдық кештер арқылы кө­семсөз шеберінің ағартушылық бағыты, артына қалдырған мол мұрасы өскелең ұрпаққа дәріптелуде. Осыған орай аудан орталығындағы №210 О.Әбілпаттаев атындағы орта мектебі мен Тереңөзек кенті мәдениет үйі бірлесіп, «Ұлт ұстазы» тақырыбында әдеби-танымдық кеш ұйымдастырды.

Мазмұнды іс-шараға халықаралық «Қазақ тілі қоғамы» ҚБ Сырдария аудандық филиалының төрағасы Ш.Нұр­се­йітов, аудандық мәслихат депутаты, аудандық «Тіршілік тынысы» газетінің бас редакторы А.Ибрагимұлы, аудандық білім бөлімінің әдіскері Ғ.Бақтиярова қа­тысты.

Алдымен орта мектеп оқушылары дарынды ақынның «Өгіз бен бақа» және «Қарға мен түлкі» мысалдарынан сахналық қойылым көрсетсе, мектеп жанынан құрылған «Жас толқын» театр үйірмесінің оқушылары ұлт ұста­зы мен сол заманның жас қаламгері М.Әуезовтың абақтыдағы трагедиялық тағдырынан үзінді ұсынды. Олар қа­зақтың біртуар перзенттерінің қиын тағдырларын, ұлт үшін жан аямайтында­рын шынайы сомдай білді.

Мұнан соң іс-шараның құрметті мей­мандары сөз сөйлеп, Ахмет Байтұр­сынұлының өмірі мен мол мұрасына тоқталды. Мектеп директоры С.Сақтапо­ва дара тұлғаның қазақ елінің келе­шегі мен іргелі ел болып қалыптасуы жо­лында ерен еңбегіне тоқталса, ха­лық­аралық «Қазақ тілі қоғамы» ҚБ Сырдария аудандық филиалының төр­ағасы Ш.Нұрсейітов көрнекті қоғам қай­раткерінің ұлт тілін бәрінен жоғары қойғанын атап өтті. Ал аудандық мәс­лихат депутаты А.Ибрагимұлы қазақ тілін тұғырлы ету үшін, халықты сауаттандыру үшін «Қазақ» газетін ашып, ел-халықтың мұң-мұқтажын баспа бетінде нақты көрсетіп отырғанын тілге тиек етті.

Тағылымы мол іс-шара барысында орта мектеп дефектологы Б.Сағидолла өз шығармашылығынан ұлт ұстазына арнаған арнау өлеңін оқыса, мектеп оқушылары ақын өлеңдерін жатқа айтты.

Ұлт қамын ойлаған қоғам қайрат­ке­рінің өмірі мен шығармашылығы жас толқынға үлгі-өнеге. Сондықтан осындай мазмұны мол іс-шаралар жастарға ұлт зиялыларын танып-білуге зор септі­гін тигізеді.

Ердос СӘРСЕНБЕКҰЛЫ
13 қыркүйек 2022 ж. 311 0