Өнерімен өрге жүзген
Қасиет қонып, құт дарыған киелі Сыр өңірінде өнерлі өрендер көп. Атақты сүлейлердің жолын жалғап, киелі өнердің керегесін кеңейтіп жүрген жас өнерпаздар да бар. Солардың бірі Асқар Тоқмағамбетов ауылының тұрғыны, кішкентай өнерпаз Еркежан Кеңесбайқызы.Еркежанды мен кішкентай кезінде көргенмін. Жақсы бір басқосуда еш қысылмай, қымсынбай өлең айтып беріп, отырғандарды таң қалдырған сүйкімді қыздың өнеріне еріксіз тәнті болған едік. Биыл 6 сыныпқа көшкен өнерлі бүлдіршін ән айтуды небәрі үш жасынан бастаған. Балалар жылы аясында дарынды балаларға ақпараттық қолдау көрсетуге арнайы айдар ашылғалы сол кездегі дарынды өнерпаз туралы қалам тербеу ойға оралған еді. Соның сәті бүгін түсті.
Еркежан отбасындағы төрт баланың кішісі, алдында екі ағасы, бір әпкесі бар. Өзі дарынды әрі талантты балдырған – оқу озаты. Даусы қазақтың кең даласындай әнші қыз балабақшадағы кезінен бастап түрлі байқауларға қатысып, жүлделі орындарға ие болып келеді.
– Әншілік қасиет жалпы қазақ халқына жат емес. Әу демейтін қазақ жоқ демекші, Еркежанның өз атасы мен әжесі де, нағашы ата-әжесі де өлеңге, қазақтың қара домбырасына жақын жандар. Қанмен дарыған қасиетті дамытып, талантын шыңдап келеді. Еркежан тек ән айтумен шектелмеді. Екінші сыныбынан бастап домбыра үйірмесіне қатысты. Қазір домбыраның құлағында ойнайды. Сондай-ақ мектеп өмірінде де өте белсенді. Білім сайыстарына, олимпиадаларға да қатысып, біздің және ұстаздарының мерейін үстем етіп жүр. Қызым қазақ өнерінің жарық жұлдыздары Бибігүл Төлегенова, Күләш Байсейітова сияқты апаларына ұқсап, қазақтың атын шығарар тұлға болып өссе деймін, – дейді Еркежанның анасы Манат Ахметова.
Ән айтқанда даусы кең даладай сезіліп, жүректерді шымырлататын ерекше дауыс иесі қазақ әдебиеті, ағылшын тілі, сурет салу пәндерін сүйіп оқиды. Ән-жырдан бөлек өлең жаттап, мәнерлеп оқу секілді байқауларда топ жарып жүрген бүлдіршін өз қатарында көшбасшылық қасиетке ие. Жан-жақтылығымен көзге түсіп, белсенділік танытқан Еркежан биылғы жазғы демалысында мектеп атынан Қапшағайдағы «Балдәурен» тынығу лагерінде демалды.
Кішкентай бүлдіршін бүгінде түрлі сайыстардан жүлделі орындар иеленіп жүр. Соның ішінде Нұр-Сұлтан, Алматы, Шымкент, Қызылорда қалаларында өткен байқаулар – жас дарын иесінің әзірге шыққан ең үлкен бәйгесі. Төменгі сыныптарда оқып жүрген кезінде-ақ республикалық деңгейдегі байқауларда үздік атанған дарын болашақта халықаралық дәрежедегі сахналарда өнер көрсетіп, қазақ атын көпке танытарына сенім кәміл.
Екінші сыныптан бастап домбыра үйірмесіне қатысқан Еркежан бүгінде ауылдық клуб жанынан ашылған «Сұлу-ай» өнер орталығында домбырашылық қабілетін жетекшісі Гүлназ Сералиевамен бірге шыңдап келеді. Ал әнші балдырғанды вокал бөлімінен қолдап, талантын дамытуға үлес қосып жүрген ұстаздары Әсел Ибраева мен Абылайхан Байділдаев.
Еркежан Кеңесбайқызы 2020 жылы Қызылорда қаласында өткен ХХІІ облыстық «Бозторғай» байқауының бас жүлде иегері. Сол жылы республикалық «Дала сазы» байқауында «Аспапта ойнау» номинациясы бойынша бірінші орынды жеңіп алған. 2021 жылы «Дарынды өнерпаздар» республикалық конкурсында ІІ дәрежелі орынмен марапатталған ол 2022 жылы «Сырдария – достық өзені» атты республикалық жас әншілер байқауына қатысып, жүлделі орын алып, қала әкімінің арнайы дипломымен марапаталған. Сондай-ақ биыл «Мың бала» ұлттық олимпиадасында бақ сынаған балдырған жеңімпаз атанып, тағы бір мәрте ата-анасы мен ұстаздарының мерейін асырды.
Өзі кішкентай қыздың бүгінде жеткен жетістіктері, «Алғыс хат», дипломдары, медаль мен арнайы кубоктары жетерлік. Оның бәрін тізбектеп жазу бізге мүмкін болмады. Айта кетейік, өнер мен білімді қатар алып жүрген кішкентай бүлдіршін биыл облыстағы Қазақ-түрік мектебіне оқуға түскен. Өскенде дәрігер болуды армандайтын өнерпазды Жаратқан тіл-көзден сақтап, әрдайым жолын ақ етсін деп тілек білдіреміз. Абай Құнанбайұлы айтқандай «Мал жұтағанмен, өнер жұтамайды». Ата-анасының еркесі атанған Еркежан болашақта қай салада жүрсе де, өнерімен өрге жүзіп, қазақтың атын шығарсын дейміз.
Аружан МҰХАНБЕТҚАЛИ
