Ұлтты ұйыстырған ұлы ақын

Осыдан екі жыл бұрын Мем­­­­­ле­­кет басшысы Қасым-Жомарт Тоқаевтың тапсырмасы бойынша Үкімет Абай күнін белгілеп, еліміздің атау­­­лы мерекелік даталар тіз­­­бесіне енгізді. 10 тамыз­ға бел­гіленген атаулы күн – қазақ қоғамы үшін тарихи­ оқиға жә­не ұлттық құн­ды­лықтарды ұлықтаудың жа­­­­­ңа белесіне кө­те­ріл­гені­міз­д­ің белгісі болды.

Зиялы қауым өкілдері мен абайтанушы ғалымдар Ұлы ойшылдың 175 жылдығына орай дербес күннің белгіленуі өте орынды бастама болғанын айтып, бірауыздан қол­дады. Өйткені, санамызды жаңғыртып, сапамызды арттыруда ақын Абай Құнанбайұлы­ның еңбектерінің алар орны ерекше. Сон­­дық­тан бұл шешімді бас ақынға ғана емес, қазақ әдебиеті мен мәдениетіне, білі­мі мен ғылымына, тұтас ұлт руханиятына көр­се­тіл­ген зор құрмет деп қабылдауға болады.

Ұлы ақын өз мәні мен маңызы жоғары шығармалары арқылы ел­дің алға жылжуына, өсіп-өркендеуіне шын ниетімен тілеулес болып, қалың ұйқы­дағы елге қозғау салып, бес асыл іс пен бес дұшпанды ажырата білу керектігін дәріптеді. Алға жылжудың негізі терең білім мен ғылымсыз бос әуре екенін нақты мысалдармен жеткізді. Ақын халықтың ізденісті серік етіп, оқып-үйрен­генін, тіл мең­гергенін, заман талабына сай кәсіп игергенін қалады. Әр шығармасында елді ынтымақ пен бірлікке шақырып, жастарды жалқаулықтан, ұйқы­шыл­дықтан, рушылдықтан, бір-бірін күн­деуден, көре алмаушылықтан, жат әдет­терден аулақ болуға үндеді. Сондықтан Абай мұрасы отан­­­­­­шыл, адал, парасатты, білімді, білікті ұрпақ тәрбиелеудің түпкі негізі болып табылады. Осы ретте, ұлы ақынның шы­ғар­маларын қазіргі заманның талаптары мен тетіктерін ескере отырып, барлық салада кеңінен насихаттаған жөн. Мұны ескерген Ел Президенті Қасым-Жомарт Кемелұлы Тоқаев өзінің «Абай және ХХІ ғасырдағы Қазақстан» атты мақаласында көптеген өзек­ті мәселелерді көтеріп, ұтымды ойларын ортаға салды. Мемлекет басшысы республикалық «Egemen Qazaqstan» газеті­не жарияланған «Абай – рухани реформатор» атты көлемді мақаласында да данышпан ақынның ілімін зерделеу арқылы елді білім игеруде, тәрбие мәселесінде, жаңа кәсіп үйренуде және ынтымақ-бірлікте Абай­ға жүгінуге шақырды.

– Абай өнегесінің құны дәуір алмасқан сайын артпаса, кемімейді. Ол баршаға түсі­нікті әрі күллі адамзатқа ортақ. Оның қара өлең болып өрілген және қара сөз болып төгілген оралымды ойлары әлі күнге дейін өмірлік бағдар болып келеді. Ұлтының бо­лашағы үшін қам жеген ұлы ойшыл күллі жұртшылықты да махаббат пен мейірімге үндеді. Ақынның осындай адамгершілік қа­ғи­даттары еліміздің бүгінгі ұрпақтары үшін де аса қажет, – деген еді Президент.

Шын мәнінде, ұлт ұста­зының ұлағаты – ешқа­шан өз маңызын, құн­дылығын жоғалт­пайтын өнеге, өшпес өсиет екені анық.

Ең бастысы, ақынның еңбектерін дәріп­те­генде науқаншылыққа жол бермеген абзал. Президентіміз айтқандай, ғұламаның өл­шеу­сіз еңбегіне орай белгіленген атаулы күнді той тойлау үшін емес, ой-өрісімізді кең­ейтіп, рухани дамуымызға арнауымыз қажет. Осы тұрғыдан келгенде Абай күні­нің мән-маңызы айрықша, көтерер жүгі ау­ыр екенін ұғамыз. Қорыта айтқанда, Абай Құнанбайұлы күткен үдеден шығу, баба рухына тағзым етіп, жалпақ жұрттың алдында атаулы датаны мағыналы етіп өткізу – бәріміз үшін үлкен абырой, ұрпаққа мақ­таныш.

Ақтөре ИБРАГИМҰЛЫ