Тіл – қазақтың қазынасы
«Балалар жылы» мен «Болашаққа бағдар: рухани жаңғыру» бағдарламасы шеңберінде аудандық мәдениет және тілдерді дамыту бөлімі және кент мәдениет үйінің ұйымдастыруымен «Тіл болашағы – балабақшадан» тақырыбында аудандық байқау өткізілді. Аудандық байқауға мемлекеттік және жеке балабақшадан келген бүлдіршіндер қатысты.Мемлекеттік тілдің қолдану аясын кеңейту және жастардың қазақ тіліне деген сүйіспеншілігін ояту мақсатында жүзеге асқан байқауда балғындар екі кезең бойынша бақ сынады. Өнерлі өрендер алғашқы кезеңде өздерін таныстырды. Одан соң балдай тәтті балғындар қазақ ақындарының өлеңдерін мәнерлеп және жатқа оқыды.
– Ана тіліміздің мәртебесін көтеру мақсатында тағылымды, танымдық іс-шаралар жиі жүзеге асқаны жақсы. Жыл сайын бұл байқау тұрақты түрде өткізіліп келеді. Балалар мәртебелі тіліміздің мән-мағынасын тереңнен түсініп, кеңінен дәріптелуіне зор үлес қосты. «Тексіздік – тілсіздіктен» деген қазақта даналық бар. Тіліміздің мерейі асқақтай берсін, – дейді облыстық тілдерді оқыту орталығының маманы Әйкерім Мұхамеджан.
Аудандық байқау қорытындысында жеңімпаз бен жүлдегерлерге арнайы диплом, бағалы сыйлық табысталды.
Балтабай ОРДАБЕКОВ
