Гаухар Сәрсенбаева, аудандық мәдениет үйінің әдіскері: Сала жұмысы серпіліске толы

Мәдениет және өнер қызметкерлерінің кәсіби мерекесіне орай аудандық мәдениет үйінің әдіскері, «ҚР Мәдениет саласының үздігі» төсбелгісінің иегері Гаухар Сәрсенбаева саладағы жұмыстың үйлестірілуі туралы газет тілішісіне сұхбат берген болатын.

– Гаухар Қожабергенқызы, мәден­иеттің ыстығы мен суығын көріп келе жатқаныңызға біршама жыл болды. Жалпы, кәсіби мереке қай жылдан бері аталып келеді?

– Сырдария ауданының төл перзен­ті ретінде өмірімнің мәдениетпен байла­нысқанына 30 жылдан астам уақыт болды. Көптің көңілінен шығу оңай емес. Көрерменге рухани, мәдени демалыс ұйымдастыруда уақытпен санас­пайтын кез болады. Жұртшылық мереке күндері демалып жатса, біздің жұмысымыз керісінше «қызады», мерекелік концерт беріп, үнемі қызмет бабында жүреміз.

Жалпы, атаулы мереке 2013 жылдан бас­тап Қазақстан Республикасы Президентінің Жарлығына сәйкес аталып келеді. Саладағы өркенді қызмет Мемлекет бас­шысының Жолдауларына, «Рухани жаңғыру», «Ұлы даланың жеті қыры», бағдарламалары және Ел Тәуелсіздігінің 30 жылдығы аясында ұйымдастырылуда. Сонымен қатар Жамбыл Жабаевтың 175 жылдығы, күйші Дина Нұрпейісованың 160 жылдығы, Алаш қозғалысының көсе­мі Әлихан Бөкейхановтың 155 жыл­дығы, ақын Мұқағали Мақатаевтың 90 жылдығы, Семей полигонының жа­был­ғанына 30 жыл толуына және басқа да мерейтойлық іс-шараларға сәйкес атап өтілуде.

Бүгінгі таңда ауданда 16 ауылдық мәдениет үйі мен клуб кәсіпорны халыққа мәдени қызмет көрсетіп келеді. Қазіргі қалыптасқан пандемияға байланысты шаралар онлайн түрде өткізілуде. Нақты айтқанда, «Жаһандық әлемдегі заманауи қазақстандық мәдениет» жобасы аясында ұлтымыздың мәдениеті мен өнерін насихаттау жолында көптеген іс-шара қолға алынды.

– «Мәдениет – мәңгілік қазына, өнер – өшпес мұра», демекші, ауданның мәдениеті мен өнерін өрге сүйреген, ел аузында қалған тұлғалар тұрғысында айтсаңыз?

– Ауданнан талай от ауызды, орақ тілді ақындар, қаламы қарымды қалам­герлер, өнерде өз өрнегін тапқан өнер­паздар, елге танымал тұлғалар шыққан. Бүгінгі ұрпақ ата дәстүрін әрі қарай жалғастырып, тәуелсіз елдің туын жел­біретіп, ұлттық құндылықтарымызды ұлық­­тап, ауданымыздың ғана емес, ұл­­ты­мыз­дың мақтанышына айналуда.

Мәдениет пен өнер туралы сөз қозға­ғанда Сырдария ауданынан шыққан әдебиет пен өнердің саңлақтарын айтамыз. Сұлтанәлі Қожықов, Серәлі Лапин, Ләтипа Қожықова, Сәбира Майқанова, Қазақстанның халық жазушысы Қалтай Мұхамеджановты, ақиық ақын Асқар Тоқмағамбетовты, ақындар Әбділда Тәжі­баев пен Қуаныш Баймағанбетовты, жазушы Әбірәш Жәмішевтің есімі ерекше аталады. Ауданда алғаш рет оркестр ұйымдастырған Құрақтың Досжанын, күйші Сламбек Ысқақов және басқа да аға-апаларды еске аламыз. Әрине, елімізге белгілі ауданнан шыққан тұлғалардың өмір жолы біз үшін мақтаныш, ұрпақтар сабақтастығы екендігі де даусыз.

Осының жалғасындай, жазушы, мәде­н­иет қайраткері Төлепберген Тобағабыл, Қазақстан Республикасы Мемлекеттік Гимннің авторларының бірі, лирик ақын Жадыра Дәрібаева, сыншы, белгілі ақын Сей­фолла Оспан, ақындар Оразбек Беспаев, Иран Ғайып, айтыскер ақын Замаддин Ибадуллаев, театртанушы Әмір-Темір Хұсейін, сазгер Рамазан Тайманов, қолөнер шеберлері Сражадин Әкімов, Жәнібек Маханбетов, мүсінші Жаркен Исмағұлов, эстрада әншісі Жеңіс Ысқақовалар да халықтың жадында мәңгі жаңғыруда.

– «Ел іші – өнер кеніші» дегендей, ауданда халықтық атағы бар ұжымдардың орны ерекше. Олардың мәдени қызметі де жыл сайын сараланып, жанданып келеді. Жалпы, ауданда қанша халықтық ұжым бар? Ауылдық жерлерде осы атақты қорғаған ұжымдар туралы не айтасыз?

– Ауданның мәдениет саласы бойынша 14 халықтық атағы бар ұжым аудан, облыс халқына мәдени қызмет көрсетіп келеді. Оның ішінде, 6 халықтық атағы бар ұжым аудандық мәдениет үйі жанында. Олар «Сәдуақасовтар» халықтық отбасылық ансамблі, «Ритм» халықтық вокальды аспапты ансамблі, «Балауса» халықтық би ансамблі, аудандық халық театры, «Дала дидары» халықтық мәдени үгіт бригадасы, «Құрақтың Дос­жаны» атындағы халықтық ұлт аспаптар оркестрі. Ал 8 халықтық атағы бар ұжымдар елді мекендерден. Олар Аманкелді ауылдық мәдениет үйі «Жадыра» халықтық әжелер ансамблі, Шаған ауылдық мәдениет үйі жанында «Сыр гүлі», «Сарыбаевтар» халық­тық отбасылық ансамблі, Бесарық ауыл­дық мәдениет үйі жанында «Жан­шуақты» халықтық әжелер ан­самблі, Қ.Мұхамеджанов атындағы Шіркейлі ауылдық мәдениет үйі жанында «Ақ Дариға» халықтық әжелер ансамблі, «Шаттық» халықтық би ансамблі, «Кө­ңіл­ашар» әзіл сықақ отауы, Айдарлы халық театры көрерменнің ыстық ықыласына бөленуде.

– Жыл сайын ұйымдастырыла­тын өнер байқауларында жерлес­теріміз жүлделі орыннан көрініп, ел мерейін асырып келеді. Биыл­ғы ауданның мәдениет саласындағы жетістіктерге тоқталсаңыз?

– Ауданның өнерпаздары қандай байқауға барса да жүлдемен оралуды дәстүрге айналдырған. Халықаралық, республикалық, облыстық байқауларда аудан намысын қорғап жүрген өнер­паздардың есімін мақтанышпен айтамыз. Атап айтқанда, биыл «Балауса» халықтық би ансамблі Елордада өткен «I m a STAR KZ» халықаралық байқауына қатысып, бас жүлде алды. Шіркейлі ауылдық мәдениет үйі жанындағы «Шаттық» халықтық үлгілі би тобы Алматы қаласында өткен Республикалық «Дала сазы» атты онлайн байқауында жүлделі 1-орынды, «Сыр гүлі» халықтық би ансамблі Украина қаласында өткен балалар шығармашылығына ар­налған халықаралық өнер фестивалінде 1-орынды иеленді.

Аудандық мәдениет үйі жанындағы З.Ибадуллаев атындағы «Алдаспан» жас ақындар үйірмесінің өнерпазы Нұрах­мет Мансұров Қармақшы ауданында Ж.Жабаевтың 175 жылдығына орай өт­кізіл­ген «Ғасыр ғұмырлы ғажап ақын» атты облыстық жас ақындар айтысына қатысып, 3-орынды. иеленді. Ғ.Жанұзақов атындағы Айдарлы ауылдық клубы жанындағы «Нұрай» би тобы Германияда өткен халықаралық байқауынан І орынды иеленіп, «айды аспанға шығарды». Қызылорда қаласында Ж.Жабаевтың 175 жылдығына орай «Көктем нұры» атты республикалық мектеп оқушылары арасында өткен айтыста Нұрах­мет Мансұров жүлдегер атанды. Аудандық халық театры Т.Ахтановтың «Күшік күйеу» комедиясын жаңа форматта екі сериялы кино фильм етіп түсіріп, көрерменге ұсынды.

– Соңғы жылдары мәдениет са­ла­сында жас өнерпаздар легі көрер­мендер көзайымына айналуда. Талантты жастардың есімін білсек?

– Бүгінгі таңда ауданда өздерінің өнерлерімен көзге көрініп жүрген талантты өнерпаздар көбейіп келеді. Оның ішінде «Сырдария» квартеті, әнші Динара Жәкеш, Абылайхан Байділдаевтың ізін басып келе жатқан Жанерке Науан, Сәулет Қайып, Батыржан Амангелдиев, Қазына Жылқайдарова, Айсара Қайратқызы, Әлия Медет есімді өнерпаздар болашақта еліміздің жарық жұлдыздары деп сеніммен айтуға болады.

– Алдағы уақытта ауданның өнерсүйер қауымын қандай жаңа­лықтармен қуантасыздар?

– Алдағы уақытта да мәдениет саласы қызметкерлері халыққа қызметтерін жоғары деңгейде көрсете береді. Өнерсүйер қауымға аудандық халық театры Шекспирдің «Ромео мен Джульеттаны» сахналау жоспарлануда.

Сонымен қатар аудандық мәдениет үйі жанындағы «Құрақтың Досжаны» атындағы халық ұлт аспаптар оркестрінің көркемдік жетекшісі әрі дирижері «Сырдария ауданының Құрметті азаматы» Сансызбай Сәдуақасұлының 70 жылдығына орай «Күмбірле күй – домбыра» атты аудандық күйшілер байқауын осы жылы 25 мамырда өткізу жоспарлануда.

Сұхбаттасқан Бибісара ЖАНӘЛІ