Аптап ыстықтан сақтаныңыз!

Таң ертемен діңкені құртып, жай­сыз­дық туғызып тұрған ауа райынан тұрғындар ­хабардар. Арнайы жедел желі «112» біре­гей нөмірі де таңнан қара кешке дейін ха­лықты сақтандыру мақ­­сатында хабарла­ма жіберіп жатқаны және бар. Жаз маусымы басталысымен, әсіресе, оңтүстік өңірлер ыс­тық ауа райының азабын тартатыны бел­гілі. Кезекті жылдың жайдары мезгілі бас­талысымен-ақ аптап­ ыстық көпшілікті әбі­герге салып үлгерді.

Синоптиктер маусым айының басы жүрек, қан қысымымен ауыратын тұрғын­­дар үшін жайсыздық туғызуы мүмкін екенін айтады. Яғни, алғашқы онкүндік­те ауа тем­пературасы 40 градустан асып түспек. «Қазгидрометтің» хабарлауын­ша, еліміз­дің бірқатар өңірлерінде қатты ыстық сақталады. Атап айтар бол­сақ, әдетте салқын ауа райымен ерек­ше­ленетін сол­түс­тік-батыс, солтүс­тік өңірлердің өзінде температура 36-41 градусқа дейін барады. Шығыс өңірінде 39 градус ыстық сақталады. Ал орта­лықта 41 градусқа дейін қызу байқалса, оңтүстік өлкесінде 37-44 градус ыстық жаз мезгілінің «сәнін» келтірмек.

Расында да қыс мезгілі ерекше қыты­мыр аязымен есте қалса, жаздың күні күн шуағынан нәр алудың да өзіндік орны бар. Десек те, ауа райының қатты ыстық болуы әсерінен көпшілік тұрғындар зардап шегуде. Әсіресе, созылмалы ауруы бар науқастарға үй жағдайында күтіну ұсынылады. Ал көшеге шығу қажеттілігі туындаса, жеңіл киініп, күннен қорғағыш құралдарды пайдаланған абзал. Міндетті түрде тиісті мөлшерде су алып жүру ләзім. Жалпы осындай ауа райында кез келген адам суды көбірек тұтынуы керек. Себебі адам бойындағы ылғал тер арқылы сыртқа шықса, оның орнын уақытылы толықтырып отыру қажет. Әйтпесе ағзаның құрғауы денсаулыққа зиян.

Сонымен қатар, аптап ыстықта өрт оқиғалары жиі тіркелетінін де ескерте кет­кіміз келеді. Әйнек сынықтарының күнмен шағылысуынан-ақ от тұтанып кетуі мүмкін. Соңы үлкен өртке әкелген жағдайлар да бар. Отпен қоса су да тілсіз жау екенін еске саламыз. Күннің ыстығын себеп етіп, салқындап алмақ мақсатта кез келген жерге суға түсуге қатаң тыйым салынады.

Аптап ыстық апта соңына дейін созы­луы мүмкін. Тұрғындарды өзінің жә­не ай­на­ласындағылардың денсаулығына бей-­жай қарамауға шақырамыз. Өтпелі ке­зең­де барынша сақтық шараларын сақтап, қауіпсіздікке баса мән берейік.

А.МҰХАНБЕТҚАЛИ