САРБАЗДАР ЖАРАП ТҰР
Елді қорғау – абыройлы міндет. Сол абыройлы міндетті адал атқару сайдың тасындай сапқа тұрған әрбір сарбаздың парызы. Әскери қызмет әрбір азаматты әскери-патриоттық рухқа, Отан алдында борышын өтеу сезімін қалыптастыруға, өмірлік қиыншылықтан мүдірмей өтуге тәрбиелейді.Ең алдымен, бойымыздағы патриотизмді дамытуымыз қажет. «Қазақстан – 2050» стратегиясында көзделген жаңа үрдіске бет түзеген терезесі тең елу елдің ғана емес, ең алпауыт отыз елдің қатарына кіруді мақсат тұтқанымыз сондықтан. Бүгінгі таңда елімізде бейбітшілік, тыныштық пен келісімді сақтау жалпыұлттық құндылыққа айналды. Қазақстан әскери техникасы дамыған, қорғаныс қабілеті күшті, бейбітшілігі баянды мемлекет болып саналады. Тәуелсіздікке 28 жыл толса да, бүгінде әскерімізге барынша жағдай жасалып келеді. Қарулы Күштердің қабылеті күшті, айбыны асқақ. Соңғы жылдары Қазақстан әскерінде жұмылдыру резервін дайындау, әскери қызметке шақыртуды ұйымдастыру, келісімшарт бойынша әскери қызметті білікті мамандармен жасақтау мәселесі қолға алынып, жыл сайын Қарулы Күштер қатары нығайып келеді.
Бүгінде аудан бойынша 1992-2001 жылы туылған азаматтарды көктемгі мерзімді әскери қызметке шақыру жұмыстары жүйелі түрде жүргізілуде. Сырдария ауданының Қорғаныс істері жөніндегі жасақтау бөлімі мәліметінше, барлығы 56 сарбаздың бүгінгі күнге дейін Отан алдындағы борышын өтеуге 31-і аттанған. Олардың басым бөлігі Ақтау, Алматы қалаларына жіберілген.
Ер азамат үшін әскер қатарында болып, қасиетті борышты өтеу – абыройлы іс. Аудандық Қорғаныс істері жөніндегі бөлім азаматтарды мерзімді әскери қызметке жіберу жөнінде облыс бойынша алдыңғы қатарда келеді. Сөзімізге дәлел, 2018 жылы жалпы екі мезгілде шақырту алған 132 сарбаздың бәрі әскери міндетін өтеген. Бұл – үлкен жетістік.
«Жеңіске тек рухтың күштілігімен ғана жетуге болады» деп Бауыржан атамыз айтқандай, ел басына күн туған шақта Отанын қорғайтын рухты сарбаз қатары көбейсін дейміз.
Майя ҚОЖАБАЙ
