Түнгі ауыл көрінісі. Бір сәтке тыныштық! Айналаның барлығы дерлік қара түске боялған. Тек сәулелі, жарық жұлдыздардан басқасын қараңғылық жапқан. Жаз болса болғаны, ауыл-аймақ болып, көрпе- төсегімізді тысқа шығарып «масахана» дейтін қызық дүниенің ішіне кіргенше асығатынбыз. Құдды бір жұлдызды аспан әлеміне билет алғандай, ұшып-қонып жүретініміз де бар. Ішіне кіргеннен кейін самсаған жұлдыздардың концертіне үңіліп, бар уайым-қайғымыздан бір серпіліп аламыз. Таласа-тармаса жарқыраған жұлдыздарды иемденуге көшетінбіз. Кей уақыттары таласпаймыз да, себебі ауылымыздың жұлдыздары бірінен-бірі өткен «алмаздың тасындай» жылтырап тұрады.

Мен мақтанып та, марқайып та айта аламын. Менің ауылымның жұлдыздары әрқашан да әдемі. Ойыннан көз ашпайтын ауыл балалары күн батып, айналаны қараңғылық жапқан сәтте, өз жұлдыздарына еміс-еміс арман мақсаттарын айтады. Олардың жұлдыздарға қарап жиі айтатын сөздері: «Мен де. Иә, мен де, сендей жарық, ешқашан сөнбейтін, қазақтың біртуар жұлдызы боламын!”- дейтұғын.

Ауылдың жұлдызды балалары оқуда озат, білімде алғыр, жарыста жүйрік, ауылымыздың жұлдыздарындай өзге мектептен биік әрі жарқырап тұрады. Мінекей, масахана ішіндегі жұлдызды аспан әлемінің концертінің авторы да өзім, көрініс ойнаушысы да өзім, тіпті, концерт жүргізушісі де өзім болып аяқтадым.