Биыл 100 жылдығын тойлайтын №35 И.Тоқтыбаев атындағы мектеп-лицейден талай түлек түлеп шықты. Сонау 1986 жылы мектеп табалдырығын аттаған оқушылар бүгінде қырықтың қырқасына шығып отыр. Мектеп қабырғасында талай қызықты күндерін өткізіп, бір-бір үйдің егесі мен отанасына айналған қыз-жігіттердің арасы әлі күнге үзілмеген. Он жыл бойы қатар оқыған сыныптастардың бірлігі жарасып, бір-бірінің қуанышына ортақтасып, қайғысын бірге бөлісіп келе жатқанына біршама уақыт болды. Көктемнің шуақты мерекесі наурызда биыл қырық жасқа толған мерейлі шақтарын тойлайтын түлектер бас қосты. Жылдан қысылмай шығып, жан басы түгел, қатарлары толысқан жандардың мерекелік кездесуі ерекше аталып өтілді.

Наурыз мерекесін айрықша тойлауға бел буған сыныптастар өткен күннің естелігін айтып, қызықты кезеңдерімен бөлісті. Сондай-ақ, Асылбек Ахметовтың шаңырағында жиналған олар дәстүр сабақтастығын жаңғыртып, ұлттық әдет-ғұрпымызды дәріптеді. Келіндер мен қыздар бір-біріне сый-сияпат ұсынып, ер азаматтар төс қағыстырып, амандық-саулық сұрасты. Мерекенің басты тағамы наурыз көжеден дәм татып, кештің көркін қыздырды. Жұптары жазылмай, әлі күнге бір-бірімен арадағы қарым-қатынасы үзілмеген достардың әрқайсысы әр саланың тізгінін ұстап, ел қатарлы қызмет етуде. Отбасында да, қызметте де, сыныптастар арасында да белсенді қыздар, сырбаз жігіттер, әзілқой жандар баршылық. Олардың ішінде Ержан Мырқайдаров, Гүлнұр Салхадинова, Нұргүл Сарқыншақова, Сәуле Максимова, Әмір Мәтібаев, Гауһар Қонақбаеваны ерекше айта кеткеніміз жөн. Бүгінде олардың барлығы ибалы келін, аяулы ана, ақылды отанасы, білікті қызметкер болған жайы бар.