ЖАҢАШЫЛ СЫНЫП ЖЕТЕКШІЛЕРІНІҢ САЙЫСЫ

Мектеп – ауылдағы руханияттың ордасы. Мұнда жас ұрпаққа сапалы білім, саналы тәрбие берумен қатар ұстаздар арасында танымдық іс-шаралар, байқаулар, семинарлар жүйелі өткізіліп отырылады. Биылғы “Жастар жылына” орай №137 орта мектепте “Жаңашыл сынып жетекші - 2019” сайысы ұйымдастырылды. Оған мектептің жаңашыл жас сынып жетекшілері қатысты. Жас ұстаздар апта бойы “Рухани жаңғыру”’ “Ұлы даланың жеті қыры” тақырыптары аясында тәрбие сағаттары мен тақырыпқа сай кештер ұйымдастырып, “Қазіргі бала тәрбиесіне көңілің тола ма?” тақырыбында эссе жазды.

Сайыстың қорытынды кешінде “Мен жаңашыл сынып жетекшімін” тақырыбында тұсаукесер, “Менің жұмыс үстелім” сынып портфолиосын таныстыру, “Ұшқыр ойдан белсенді әрекетке” педагогикалық ситуациялық сұрақтарға жауап беру, өз өнерін көрсету сынды сайыс түрлеріне қатысып, бақтарын сынады.

Өз кезегінде сайысқа мектеп директоры Б.Есназар, әлеуметтік педагог А.Нұрышов, бас­тауыш сынып бірлестігінің жетекшісі Қ.Бодыбаева және биология пәні мұғалімі А.Табынбаева және тәлімгер Л.Қалыбай төрелік жасады.

Сайыс қорытындысы бойынша 6-а сынып жетекшісі Ақбота Аманова бас жүлде, 3- б сынып жетекшісі Әйгерім Ысқақова І орын, 7-б сынып жетекшісі Гүлсім Жоламанова ІІ орын, 11-ші сынып жетекшісі Жансая Жаздауқызы ІІІ орын иеленсе, сынып жетекшілер Фарида Бодыбаева, Ақтоты Аралбайқызы, Ұлболсын Жақсылықова Алғыс хатпен марапатталды. Сайысқа қатысушылар демеушілердің бағалы сыйлықтарына ие болды.

Ш. БАЛТАБАЙҰЛЫ