Jaqynda jalpy bilim beretin pánder boıynsha respýblıkalyq olımpıadanyń oblystyq kezeńi ótkizilgen bolatyn. Oǵan aýdan boıynsha 16 oqýshy qatysyp, onyń 11-i júldeli orynǵa ıe boldy. Bilim básekesinde aýdan oqýshylarynan quralǵan arnaıy top III dárejeli «Eń úzdik olımpıadalyq komanda – 2019» dıplomymen marapattaldy.

Oblysta baqtaryn synaǵan oqýshylar buǵan deıin mektepіshilik, aýdandyq bilim báıgesinde joǵary nátıje kórsetken. Sonymen qatar, olar ózderi tandaǵan pánderi boıynsha naǵyz júırik ekendikterin taǵy da dáleldedi. Kún saıyn bilim deńgeıin shyńdaı túsken oqýshylardyń eńbegi zor. Ustazdardyń úkilegen úmitin aqtaǵan 3 oqýshy aldaǵy ýaqytta respýblıkalyq kezeńde aımaq namysyn qorǵaıtyn bolady. Olardyń qatarynda birinshi oryn alǵan №37 mektep-lıseıdiń 11 synyp oqýshysy Nazym Serikbaeva qazaq tili men ádebıeti páninen, ekinshi orynnan kóringen №35 mektep-lıseıdiń 11 synyp oqýshysy Nurbol Amanýlla geografııa páni boıynsha jáne №36 mektep-lıseıdiń 10 synyp oqýshysy Erkebulan Saǵatbaev orys tili men ádebıeti páninen baq synaıtyn bolady.