Орталық коммуникациялар қызметінде тұрғын үйге арналған мемлекеттік бағдарламалардың іске асырылуына арналған баспасөз конференциясы өтті. «Нұрлы жер» мемлекеттік бағдарламасының іске асырылуы мен «7-20-25» халыққа жеңілдетілген несие беру бағдарламасының іске қосылуына байланысты тұрғын үй құрылысына салынған инвестицияның өсімі байқалатыны айтылды.

2018 жылдың 8 айының қорытындысы бойынша 702 млрд. теңгеге жуық инвестиция тартылған. Ол өткен жылдағы деңгейден 31%-ға артық. Биыл 7,7 млн. шаршы метр тұрғын үй пайдалануға берілді, бұл 2017 жылдың сәйкес кезеңімен салыстырғанда 112 пайызға артып отырғанын айтты орталық коммуникациялар қызметінде өткен баспасөз конференциясында ҚР Инвестициялар және даму министрі Жеңіс Қасымбек.

 «Республика бойынша барлығы 67 мыңнан астам баспана пайдалануға берілді, оның ішінде 27 мыңға жуық жеке үй бар. Жоспар жыл соңына дейін толық көлемде орындалатын болады (жалпы жоспар көлемі 12,1 млн. ш. м). Айта кететін бір жайт, бұрын жеке тұрғын үй салу құрылысы басым болса, қазір көпқабатты үйлердің көлемі артты»,-деп мәлімдеді Жеңіс Махмұдұлы.  Баспана сатып алуға мүмкіндіктері жоқ халықтың әлеуметтік әлсіз топтары үшін жыл сайын сатып алу құқығынсыз арендалық 3 мың пәтер салынады.   «Бағдарламада 2 жыл ішінде барлығы 6182  арендалық пәтерді (331,0 мың ш. м) пайдалануға беру жоспарланған. Биылғы жылдың 8 айындағы 922 пәтерді яғни  49,6 мың. ш. м қосқанда бүгінгі күні 3542 пәтер болатын көлемі 196,2 мың шаршы метр үй салынды. Әлеуметтік тұрғын үйдің 1 шаршы метрін жалдау төлем ақысы шамамен 100 теңгені құрайды», - деп атап өтті министр.

2 жылға жуық уақытта әкімдікте кезекте тұрған азаматтар оның ішінде тұрақты табыс­тары бар мұғалімдер, дәрігерлер, мемлекеттік қызметкерлері мен Тұрғын үй құрылыс жинақ жүйесі салымшылары үшін биылғы 8 айда тапсырылған 1970 пәтерді қосқанда 18,5 мың кредиттік пәтер пайдалануға берілген.

 «Нұрлы жер» бағдарламасы аясында биылдан бастап жыл сайын 40 мың учаскеге инфрақұрылым желілерін тарту жоспарланып отыр. 14 облыс орталығында бір шаршы метрінің құны 120 мың теңгені құрайтын бірыңғай сәулеттік стильде пилоттық жобаларды іске асыру жалғастырылуда.

 «Баспана» ипотекалық ұйымының дерегі бойынша, бағдарлама іске қосылғаннан бергі 2 айда халықтан қатысушы-банктерге ипотека алуға 2562 өтініш түскен. Бүгінгі таңда жалпы сомасы 20,0 млрд. теңгеге 1695 ипотекалық қарыз беру қолдау тапты.  Қалған өтініштер екінші деңгейлі банктердің қарауында жатыр.