Зияткерлік ойынның үздіктері
Алматы облысында 23-30 шілде аралығында тоғызқұмалақтан жастар арасындағы Қазақстан Республикасының жекелей чемпионаты өтті. Еліміздің барлық өңірінен жиналған үздік спортшылар қатысқан байрақты бәсекеде Қызылорда облысының намысын қорғаған Сырдария ауданының спортшылары жоғары шеберлік танытып, жүлделі орындардан көрінді.Чемпионат қорытындысы бойынша сырдариялық зияткер ойын шебері Нұрай Мектепхан рапид бағдарламасында қарсыластарының бәрінен басым түсіп, алтын медальді жеңіп алды. Классикалық ойын түрінде де тартысты бәсекеде бақ сынап, қола жүлдені иеленді. Осылайша, жас спортшы бір чемпионаттың өзінде екі мәрте жеңіс тұғырына көтеріліп, өзінің жоғары дайындық деңгейін дәлелдеді. Ал ауданның тағы бір талантты спортшысы Әсем Дәуренбекқызы рапид бағдарламасында шебер ойын өрнегін көрсетіп, Қазақстан чемпионатының қола жүлдегері атанды. Оның байыпты тактикасы мен ойын барысындағы дәл шешімдері төрешілер мен жанкүйерлердің жоғары бағасына ие болды.
Тоғызқұмалақ – қазақ халқының ғасырлар бойы қалыптасқан ұлттық интеллектуалдық мұрасы. Логикалық ойлау мен төзімділікті талап ететін бұл спорт түрінде үздік нәтиже көрсету – үлкен еңбектің жемісі. Сондықтан сырдариялық жас спортшылардың жетістігі – аудан спортының дамуына қосылған маңызды үлес.
Жас дарындардың жеңісті жолында олардың жаттықтырушысы Білімжан Елеусіновтің еңбегі зор. Ол шәкірттерінің әр жарысқа тыңғылықты дайындалатынын айтып, алдағы уақытта бұдан да биік белестерді бағындыруға күш салатындарын жеткізді.
– Ел чемпионатының деңгейі өте жоғары болды. Әр өңірден үздік спортшы шоғыры жиналды. Соған қарамастан Нұрай мен Әсем өз мүмкіндігін толық көрсете білді. Жеңіс тұғырындағы қуаныш – олардың бірнеше жылдық тынымсыз еңбегінің нәтижесі. Шәкірттерімнің жеңіске деген жігері, жауапкершілігі мен табандылығы қуантады. Біз мұнымен тоқтап қалмаймыз. Алдымызда өтетін республикалық және халықаралық жарыстарға тыңғылықты дайындалып, бұдан да жоғары нәтижеге қол жеткізуге күш саламыз. Сырдарияның тоғызқұмалақ мектебінің әлеуеті жоғары, – дейді жаттықтырушы.
Айта кету керек, Нұрай Мектепхан мен Әсем Дәуренбекқызы соңғы жылдары республикалық деңгейдегі жарыста тұрақты түрде жүлдегер қатарынан көрініп келеді. Олардың әрбір жетістігі – жүйелі жаттығудың, табандылықтың және ұлттық спортқа деген сүйіспеншіліктің айқын дәлелі.
Сырдариялық спортшылардың бұл жеңісі аудан жастарына үлкен серпін беріп, тоғызқұмалақ спортының дамуына жаңа серпіліс сыйлайтыны анық. Ендігі мақсат – осы жетістікті еселеп, халықаралық аренада Қазақстанның көк байрағын биіктен желбірету.
«Тт» ақпарат
