«Антиколл-орталық» – алаяқтарға тосқауыл
Қазіргі уақытта интернет-алаяқтықтың түрлері көбейіп, азаматтардың қаржысын заңсыз иемдену жағдайлары жиілеп кетті. Әсіресе электрондық қызметтерді толық меңгермеген егде жастағы адамдар жиі зардап шегеді. Кей жағдайларда олардың телефоны немесе жеке деректері арқылы өзге адамдар заңсыз несие рәсімдеп, қаржыны жеке мақсаттарына жұмсайтын фактілер де кездеседі. Сонымен бірге кәсіби алаяқтар түрлі айламен азаматтардың жеке мәліметтерін алып, олардың атына қашықтан несие рәсімдеп жатады. Осындай келеңсіз жағдайлардың алдын алу маңызды.– Қазақстан Республикасы Бас Прокуратурасымен 2025 жылдың сәуір айынан бастап «Антиколл-орталық» жобасы іске асырылуда. Жобаны іске асыру барысында бүгінгі күні алаяқтардың 1,5 миллионнан астам қоңырауы бұғатталған. Аталған жүйе алаяқтық қоңырауларды бұғаттаумен қатар, алаяқтардың байланысына түскен азаматтарды анықтауға мүмкіндік береді. Қабылданған шаралардың нәтижесінде жалпы сомасы 251 млн теңгені құрайтын 114 кредиттің заңсыз рәсімделуінің жолы кесілді. Жобаны іске асыру соңғы үш жылда алғаш рет интернет-алаяқтық қылмыстары санының өсуінің теріс үрдісін өзгертуге мүмкіндік берді. Нәтижесінде олардың саны 11 пайызға төмендеп, 12 390-нан 11065-ке дейін азайды. Құрметті аудан тұрғындары! Қырағылық танытып, жеке деректеріңізді қорғаңыз. Интернет кеңістігін қауіпсіз пайдалану – әр азаматтың жауапкершілігі. Алаяқтардың арбауына түсіп қалмау үшін ақпараттық қауіпсіздік талаптарын қатаң сақтауға шақырамыз, – дейді аудан прокуроры Абай Әлімбаев.
Айта кетейік, «Антиколл-орталық» – Бас прокуратура мен «Қазақтелеком» бірлесе отырып құрған жоба. Негізгі мақсаты – ел аумағындағы телефон арқылы жасалатын алаяқтық қоңырауларды анықтап, автоматты түрде бұғаттау. Жүйе арқылы қылмыстық әрекеттер мен алаяқтық деңгейін төмендету көзделеді. Осы уақытқа дейін аталған жоба өз мүмкіншілігін тиімді пайдаланып, байланыс операторларымен тығыз жұмысты үйлестіріп келеді.
Бұл ретте тұрғындарға бейтаныс нөмірден хабарласып, өзін банк, құқық қорғау органы немесе басқа да қызметкер ретінде таныстырса, әр сөзіне мән беру қажеттігін ескертеміз. Алаяқтар кәсіби маманша сөйлеп, арбап алуы мүмкін. Қоңырау шалған адам қандай да қызметті жаңарту үшін сілтемеге қосылуды немесе кодты айтуды сұраса, жауап бермеңіз. Байланысты үзіп, бұл туралы тиісті органдарға хабарлау маңызды. Сондай-ақ қауіпсіздік үшін банк шотын уақытша бұғаттау да артықтық етпейді. Осы ретте, ескерте кетейік, қызметкерлер сізден ешқандай код сұрамайды, тек арнайы жеңілдік туралы ақпараттандыруы мүмкін.
А.МҰХАНБЕТҚАЛИ
Коллажды жасаған Зәуреш СМАҒҰЛ, «EQ»
