Тереңөзек кенті әкімі атқарылған жұмыстарға тоқталып өтті. Аудан орталығында тұрғындардың сұранысына сәйкес бірқатар көшелерге түнгі жарық шамдары орнатылып, көше жарығы тіректерін жаңарту жұмыстары жүргізілді. Сондай-ақ, кент аумағындағы су арналарына тазарту және қайта қалпына келтіру жұмыстары атқарылуда.

– Ауданда жол жөндеу, газдандыру, ауыз сумен қамтамасыз ету, тұрғын үй құрылысы және инфрақұрылымды жаңғырту бағытында жүйелі жұмыстар атқарылып келеді. Сонымен қатар білім беру, денсаулық сақтау, мәдениет және спорт салаларында да бірқатар маңызды жобалар жүзеге асырылуда. Қоғамдық қауіпсіздікті күшейту мақсатында аудан орталығы мен елді мекендерге бейнебақылау камералары орнатылды. Бұл бастамалардың барлығы тұрғындардың өмір сүру сапасын арттыруға бағытталған», – деді Берік Әбдіғаппарұлы.

Кездесу барысында аудан басшысы ауданның әлеуметтік-экономикалық дамуы, халықтың өмір сүру сапасын арттыру және инфрақұрылымды жаңғырту бағытындағы жұмыстар алдағы уақытта да жалғасатынын атап өтті. Сондай-ақ, тұрғындар тарапынан көтерілген мәселелер кезең-кезеңімен шешімін табатынын жеткізді.

Кездесу соңында тұрғындардың ұсыныс-пікірлері тыңдалды және жеке қабылдау өткізілді.