Есірткімен күрес қалай жүріп жатыр?
Қоғамның негізгі мәселелерінің бірі - нашақорлық. Адамзат баласы бұл індетпен ілкіден бері күресіп келеді. Қазіргі таңда есірткіге қарсы күрес жүргізу үшін жауапты мамандар аянып қалып жатқан жоқ. Биыл есірткі қылмысына қарсы іс-қимыл бойынша 210 құқық бұзушылық анықталған. Есірткінің синтетикалық түрінің байланыссыз тәсілмен, интернет және әлеуметтік желілер арқылы таралуы ұйымдасқан қылмыстық топтарды анықтауға кері әсерін тигізуде дейді мамандар. Қоғам дертін ауыздықтау мақсатындағы нәтижелі жұмыстарды Облыстық полиция департаментінің есірткіге қарсы іс-қимыл басқармасының бастығы Біржан Багисов баяндады. - Есірткі қылмысымен айналысатын ұйымдасқан қылмыстық топ іс-әрекеттерін анықтау, қылмыстық жолмен алынған қаражаттарды заңдастыру бағытында қазіргі уақытта Басқармамен қылмыстық топтарға қатысты әзірлеме жұмыстары жүргізілуде. Заңсыз айналымнан 1 тонна 315 килограмм есірткі заттары анықталды. Сондай-ақ үй жағдайында сора өсімдігін өсірген 5 фито-зертхана табылды. Облыс орталығында полицияның кешенді күштерімен күнделікті нарядтарда көп қабатты үй аулалары, гараждар мен құрылыс аумақтары арасында тексеру жұмыстары үнемі жүргізіліп, жедел басқару орталығының бейне-камералары арқылы шолу жұмыстары жүргізілуде. Жүргізілген жедел профилактикалық іс-шаралардың нәтижесінде есірткі жарнамалайтын «граффити» суреттер төмендеді. "Кибернадзор" ақпараттық жүйесіне синтетикалық есірткіні жарнамалайтын 1050 сайт енгізіліп, бұғатталды. Іздеудегі қылмыскерлер бойынша жедел-іздестіру жұмыстары жалғасуда. Биыл профилактикалық жұмыстарды жүргізу үшін жергілікті бюджеттен 17 млн теңге бөлінді. Бөлінген қаражатқа тұрғындардың нашақорлыққа қарсы иммунитетін қалыптастыру мақсатында 819 іс-шара өткізілді,- деді Біржан Бабырұлы.
@Қызылорда облысының Өңірлік коммуникациялар қызметі
