Өзекті мәселелер – күн тәртібінде

Нақты тапсырма – нәтижелі жұмыс кепілі. Осы орайда аудан әкімдігінің мәжіліс залында аппарат отырысы өтті. Жиынға аудан әкімінің орынбасары Димаш Байдушев төрағалық етіп, оған бөлім, мекеме басшылары қатысты. Күн тәртібінде үш мәселе қаралды.

Бірінші мәселе бойынша алдағы оқу жылына дайындық барысы туралы Сырдария аудандық білім бөлімінің басшысы Еркебұлан Жақып баяндады.

– Сырдария ауданы бойынша 53 білім беру ұйымы жұмыс жасайды. Оның ішінде, 30 мектепке дейінгі білім беру ұйымы, 17 мектеп, 6 қосымша білім беру ұйымы бар. Аудан бо­йынша 17 мектептің 16-сы типтік, біреуі ыңғайластырылған мектеп. Аудан мектептерінде апатты жағдайда және үш ауысымда жұмыс істейтін мектеп жоқ. 17 мектептің 5-еуі инновациялық мектеп-лицей. Мектеп-лицейлер жара­­тылыс­тану-математикалық бағыт­та жұ­мыс жасайды, 5 тірек мектеп­ке магниттік мектеп жүктелген. Қазір­гі таңда бірлескен жұмыстар жасалуда. 2025-2026 оқу жылында 1-сыныпқа 775 бала қабылданады, барлық оқушы құжаттары электронды үкімет порталы арқылы қабылданды. Аудан­дағы білім беру ұйымдары пән кабинеттерімен жабдықталған. Аудан бойынша 15 физика кабинеті, 14 химия кабинеті, 14 биология кабинеті, 9 робототехника кабинеті және 2 STEM кабинеті бар. «Мектепке жол» республикалық қайырымдылық акциясын ұйымдастыру бойынша аудан әкімдігімен іс-шара жоспары бекітіліп, ведомоствалық бағынылыстылығына қарамастан барлық мекемелерге хат жолданды. Акция барысында көмек алатын балалардың базасы жасақ­талды. Жалпыға міндетті оқу қоры есебінен берілетін бір реттік қар­жылай көмек көрсетілді. «Мектепке жол» акциясы жалғасын табуда, – деген бөлім басшысы білім беру ұйымдарының жаңа оқу жылына, жылыту маусымына дайындығы толық аяқталғанын, сондай-ақ ағымдағы жөн­деу жұмыстары жүргізіліп жатқан мек­тептер мен күрделі жөндеу жұмысы жүргізіліп жатқан Сәкен Сейфуллин ауылдық мектебіндегі ахуалды баяндады.

Екінші мәселе бойынша аудандық полиция бөлімі бастығының орынбасары Әділхан Қанзадаев «Аудан аумағында қылмыстың алдын алу мен жол қауіпсіздігін қамтамасыз ету шараларын ұйымдастыру жұмыстары» туралы хабарлама жасады.

«Аудан аумағында қоғамдық тәр­тіпті сақтау, қылмыстың алдын алу және жол қозғалысы қауіпсіздігін қамтамасыз ету мақсатында құқық қорғау органдары мен жергілікті атқарушы органдар бірлесіп кешенді шара­ларды жүзеге асыруда. Дегенмен қауіпсіздік шаралары қай кезде болсын күн тәртібінен түскен емес. Бұл бағытта бірлескен шараларды тоқ­таусыз жалғастыруымыз керек» деді аудан әкімінің орынбасары.

Ал үшінші мәселе Ақжарма ауылдық округіндегі атқарылған жұмыстар мен алдағы міндеттер туралы болып, Ақжарма ауылдық округінің әкімі Ерлан Ешмұратов баяндады.

– Ақжарма ауылында 2800-ге жуық халық тұрады. Ауылда 519 түтін басы бар. Бүгінде ауыл жолдары жөнделіп, көше бойына қаз-қатар жарықшам орнатылған. Әлеуметтік нысан санатына кіретін мектеп, мәдениет үйі, дәрігерлік амбулатория секілді бірнеше мекеме халық игілігі үшін жұмыс жасау­да. Елді мекенде «Ақжарма және К» және «Ақжарма-2» секілді аграрлық саланың белді құрылымдарымен қатар, 45 шаруа қожалығы өз кәсібін жүр­гізуде. Жергілікті халық шағын және орта бизнеспен айналысып, мемлекеттік бағдарламалардың ша­пағатын көруде, – деген ауыл әкімі нақты деректерді келтіріп өтті.

Сондай-ақ аудан әкімдігінің отырысында күн тәртібінен бөлек қосымша бірқатар мәселе қаралды. Өз кезегінде аудан әкімінің орынбасары Димаш Серікбайұлы көтерілген мәселелер ая­сында бірқатар тапсырма беріп, орындалуы қадағалауда болатынын ескертті.

А.МҰХАНБЕТҚАЛИ