Көз дәрігері өзінің ерекше білімімен шетелді таңғалдырып, Ұлыбритания, Канада, Жапония, Сингапур, АҚШ, Гонконг елдерінен шақырту алып, бүгінде Канада мен Гонконг елдерінде ғылыми қызметін жалғастыруда. Туған жер­дің мақтанышы – адамзат тарихында бұрын соңды болмаған екі бағыттың – офтальмология және квантты физика ортасында жасалатын жобамен жұмыс жасауда. Жоба сәтті іске асқанда көздің ем­делуге келмейтін, соқырлыққа алып келетін бірнеше ауруларды квантты технология арқылы тоқтатуға мүмкіндік болады. Атал­ған технология қазір осы екі ел ортасында құрастырылуда.

– Ғылыми әлемде шекара жоқ, канадалық ғалымның ойлап тапқан инсулинін қазақстандық қант диабеті бар науқастар да қабылдайды. Сол сияқты, біздің де көздеген нысанымыз әлемдегі барлық макулярлы дегенерациясы, глаукомасы бар науқастарға көмек көрсету. Оның үстіне «жұмыла көтерген жүк жеңіл» дегендей, осындай жобаларды бірнеше ел бірге қаржыландырып, қолдау көрсетеді. Жоғарыда аталған топ­тың ішіне жеті елден келген жеті ғалым кіреді. Атап айтсақ, АҚШ, Канада, Ұлыбритания, Қытай, Ресей, Сербия және Қа­зақ­с­тан елдері. Тағы бір айтарым, әрбір қазақ өз еліне оралып, үйренген тәсілдерін отандастарының пайдасына қолдануға асығады. Сон­дықтан да қазір кетіп жатқан білікті дәрігерлер бір күні оралып, Қазақстанды көркейтуге атсалысады деп ойлаймын және сенемін, – дейді ғалым өз сұхбатында.

Негізінен, квантты технология құрастырып, көз ауруларын ерте диагностикалау жобасын бастаған ғалымдар тобы жаңа жарық көзінің арқасында көздің торлы қабығын зерттейтін томограф жасап жатыр. Жақсы қорытындылар болғанда, болашақта көзді емдейтін маман­дардың пайдалануына беріледі.

Дәрігер көздің саулығын сақтау үшін кез келген адам дәрігерге сырқат болмаса да жылына бір рет көрініп тұрғаны жақсы деп кеңес береді. Дәрігерге қаралғанда, түр­лі дәрумен мен жаттығуларды көр­сетіп, кешенді күтім әдістерін үйретеді.

Айту керек, Мұхит Құлмаған­бетов – аудандағы №36 Ә.Тәжібаев атындағы мектеп-лицейдің түлегі. Президенттің қолынан марапат алған ғалымды жарқын жетістігімен құттықтаймыз!