Сұм майданды басынан өткеріп, қиын­­шылық заманды еңсеріп, ғасыр жасаған майдангеріміз Яхия Тасыров бүгінгі таңда 103 жаста. Кішкентай бал­дырғандар көптің көзін көрген қария­дан батасын алып, ерекше кө­ңіл-күйге бөленді. Өскелең ұрпаққа тағылымды өмірімен, ғибратты сөз­дері­мен аталық өсиетін айтып, сұра­пыл соғыстың залалын әңгімелеп берді. Бүлдіршіндердің ішінен ерегі суы­ры­лып шығып, «Ата, сіз неше жас­тасыз?» деп сұрағаны ақсақалдың ерік­сіз жымиюына себепкер болды. Ар­да­гердің шаңырағындағы басқосуда оқушылардың сынып жетекшісі май­дан­герді мерекемен құттықтады.

– Сізді Ұлы Жеңістің 80 жыл толу мерекесімен шын жүректен құттық­таймыз. Осы бейбітшілік заманда, мың­даған ер-азаматтың маңдай тері мен қаны жатыр. Болашақ пен жар­қын өмірді сыйлағандарыңыз үшін алғы­сымыз шексіз. Біз сізді қай кезде де мақтан тұтамыз. Осы өскелең ұрпақ сіздің майдан даласында көрсеткен ерлігіңізді ешқашан ұмытпайды. Айтулы мерекенің қарсаңында құтты ша­ңы­рағыңызға келіп құттықтауды жөн көрдік. Тәуелсіз еліміздің әрбір азаматы мен бүлдіршіні сіздің жанқияр ерлігіңізді әрдайым жадында сақтайды. Сіздің берген ақылыңыз бен ақ батаңыз оқушыларға жол бастаушы болмақ, – деді бастауыш сынып мұғалімі Махаббат Сайымова.

Өз кезегінде ҰОС ардагері Яхия Тасыров оқушыларға алғысын айтты.

– Айналайын, жасаған бергендер! Ұлы Жеңістің 80 жылдығымен құт­тық­тап келгендеріңе алғыс айтамын. Біздің көрген заманды сендер көр­меңдер. Тек бейбітшілік заманда тату-тәтті жүре беріңдер. Бірің өс­сең­дер, екіншің қызғанбаңдар, арты­­нан жүріп отырыңдар. Жүрген жер­леріңде мейірім мен шапағатыңды төге біліңдер. Болашақ сендердің қол­дарыңда. Тек ашық аспанның ас­тында бір жағадан бас, бір жеңнен қол шығарып бірге жүріңдер. Бүгінгі шаңы­рағыма келген әр бүлдіршінге ақ батамды бердім. Оқуда үздік болып, ата-аналарыңның көзқуанышы болып жүре беріңдер, – деді майдангер, ғасыр адамы.