Әр сарбаз – ел мақтанышы
Отан алдындағы борышын абыроймен өтеп, аман-есен туған жеріне оралған әрбір сарбаз – елдің тірегі, ертеңнің кепілі. Солардың бірі – Асқар Ержанұлы жақында ғана әскер қатарынан оралып, ауылына, отбасы мен достарына зор қуаныш сыйлады.Асқар Есназаров Қазақстан Республикасының Қарулы Күштері қатарында бір жыл қызмет етіп, әскери тәртіп пен жауапкершіліктің не екенін терең түсініп қайтты. Ол Маңғыстау облысы Бейнеу ауданындағы №99116 барлау әскери бөлімінде сап түзеп, түрлі әскери дайындықтан өтті. Қызығы мен қиындығы қатар жүретін әскери борышта болу әрбір қазақ азаматының міндеті. Осы жауапкершілікке мойымай, түрлі оқу-жаттығудан басын тік көтеріп өтетін сарбаз көп емес.
– 2024 жылы сәуір айының 6-да әскерге аттандым. Қазақстанның барлық қаласынан 115 бала жиналдық. Ант қабылдау рәсіміне дейін тез тіл табысып, араласып кеттік. Әскери Антты мамыр айының 18-і күні қабылдап, ата-анамызбен кездесуге екі күн уақыт берген болатын. Сосын бізді әр түрлі ротаға бөліп тастады. Мен №1 Арнайы мақсаттағы барлау ротасында болдым. Ротада 30 сарбаз борышын өтеді. Жақын достар тауып, бір нанды бөлісіп жедік. Бір жылдық әскери өмір маған уақыт пен ата-ананың қадірін ұғындырды, – дейді жас сарбаз.
Он екі ай бойы туып өскен үйінен жырақта жүріп, ел алдындағы жауапкершілігін өтеу кез келген Қазақстан азаматының абыройы. «Әскери жорықтағы офицер, сержанттарымыз өте жақсы адамдар болды. Бір жылымыз қалай өте шыққанын байқамай да қалдық» дейді Асқар. Ауданға қарасты О.Мәлібаев ауылында 2005 жылдың ақпанында дүниеге келген Асқар Ержанұлы – ата-анасының тұңғышы. Мектепті жақсы оқу үлгерімімен бітірген бозбала қазір шыңдалған сарбаз. Борышын өтеуде жақсы көзге түсіп, жазғы және қысқы оқу-жаттығуға белсене қатысқан. Полигонда бір айлық дала жаттығуында болып, әскери тәжірибе жинады. Саптық дайындық пен қатар физикалық жаттығу мен тактикалық машықтар бойынша үздіктер қатарынан көріне білген.
– Ротамыз №1 Арнайы мақсаттағы барлау болғандықтан бізде көптеген барлау жұмыстарымен тәжірибе жүргізілді. Соның бірі «жолда кетіп бара жатқан жауды барлай отырып, тұтқынға түсіру» тәжірибесі өтті. Оқу жаттығуда жауды тұтқынға түсіріп, барлаудың қыр-сырын үйрене білдік. Барлығымыз қызығып қатысқандықтан ба, уақытымыз тез өте шыққан болатын, – дейді абыройлы сарбаз.
Асқар Ержанұлы туған жеріне биыл сәуір айының 8-і күні келген. Отбасы мен достарын аман-есен оралуымен қуантқан азамат қазір әскердегі кезеңдерін күліп еске алады. Отан алдындағы міндетін адал атқарған әр сарбаз – ел мақтанышы. Жаңа Қазақстанның дамуына әрбір жас сарбаз өз үлесін қосуы шарт. Олардың бейбіт өмірді күзетіп, ел амандығы жолында атқарған қызметі әрдайым құрметке лайық.
Гүлсезім ЖАНСЕРІКҚЫЗЫ
