Жаңа қорғау шаралары: зияткерлік меншік саласындағы заңнама жетілдірілуде
Қазақстан Республикасының Әділет министрлігі «Қазақстан Республикасының кейбір заңнамалық актілеріне зияткерлік меншік құқықтары мәселелері бойынша өзгерістер мен толықтырулар енгізу туралы» Заң жобасын әзірледі, ол зияткерлік меншік объектілерін қорғаудың қосымша құқықтық құралдарын енгізу арқылы зияткерлік меншік саласындағы заңнаманы жетілдіруге бағытталған.Аталған заң жобасы ағымдағы жылдың 23 сәуірінде Қазақстан Республикасы Парламенті Мәжілісінің бірінші оқылымында мақұлданды.
Аталған түзетулер төрт кодекске және бес салалық заңға (Азаматтық, Қылмыстық, Кәсіпкерлік және Кеден кодекстері, Авторлық құқық және сабақтас құқықтар, Селекциялық жетістіктерді қорғау, Патент заңы, Тауар таңбалары, қызмет көрсету таңбалары, Географиялық белгілер мен тауардың шығарылған жерінің атаулары, Интегралдық микросхемалар топологияларын құқықтық қорғау туралы) өзгерістер мен толықтыруларды енгізуді көздейді.
Енгізілетін түзетулердің негізгі бағыттары:
- Телерадио хабарларын тарату ұйымдарының құқықтарын қорғау.
Халықаралық Рим конвенциясына сәйкес хабар тарату ұйымдарының құқықтары нақтыланды.
- Көру қабілеті нашар адамдарға арналған кітаптарға қол жеткізу.
Марракеш шартына сәйкес, автордың келісімінсіз Брайль қарпімен жарияланған туындыларды көбейтіп қана қоймай, таратуға, көпшілік алдында орындауға, жалпыға қолжетімді етуге және көру қабілеті бұзылған адамдар үшін басқа да арнайы форматтарды пайдалануға рұқсат етіледі.
- Тауар таңбаларын жедел тіркеу.
Өтініш берушінің өтініші бойынша тауар белгісін небәрі 3 айда тіркеуге болады (7 айдың орнына). Бұл әсіресе бәсекелестік ортада шағын және орта бизнес үшін маңызды.
- Қарсылық білдіруге көбірек уақыт.
Тауар таңбасын тіркеуге қарсылық білдіру мерзімі 1 айдан 2 айға дейін ұзартылды, бұл сіздің құқықтарыңызды қорғауға көбірек мүмкіндік береді.
- Патенттік жүйені оңтайландыру.
Егер өтініш бастапқы кезеңде талаптарға сәйкес келмесе, бас тарту туралы шешім тез қабылданады. Бұл талапкерлердің уақыт пен ақшаны босқа кетіруіне жол бермейді.
- Патенттік сенім білдірілген өкілдердің мамандануы.
Патенттік сенім білдірілген өкілдердің қызметін нақты бөлу енгізілуде: тауар белгілері бойынша және өнертабыстар бойынша. Бұл қызметтердің сапасы мен кәсібилігін арттырады.
- Басқа біреудің тауар белгісін заңсыз пайдаланғаны үшін жауапкершілікті күшейту.
Жауапкершілікті күшейту контрафактілік өнімдердің таралуын тиімді болдырмау және Қазақстанның инвестициялық тартымдылығын арттыру үшін қажет.
Ұсынылып отырған өзгерістер халықаралық стандарттар мен бизнес қажеттіліктерін ескере отырып, зияткерлік меншік құқықтарын қорғауға және әкімшілік рәсімдерді жеңілдетуге бағытталған.
