Тариф бағасы қымбаттай ма?
Бұрыннан үлкендер «су мен жарыққа төлеген ақша адал» деп айтып отыратын. Әрине, жарықсыз әрбір үйде тіршілік өнбейді. Электр желісін пайдалану арқылы ертеректе орын алған жарықсыз күндер келмеске кетті. Жаңа жылдан бастап аудандағы «Шиелі жарығы» мекемесі жабылып, ондағы мамандар «Қызылорда электр тарату тораптары компаниясы» акционерлік қоғамының аудандық электр торабына қосылды. Аудан тұрғындары арасындағы аталған мекеме жұмысына байланысты туындаған сауалдар легін саралай келе, қоғамдағы өзекті бірқатар мәселеге қатысты аудандық электр торабы басшысының міндетін атқарушы Серік Бегмановпен шағын сұхбат құрдық.– Серік Өтегенұлы, қазіргі уақытта көптің көкейінде жүрген өзекті мәселенің бірі – тариф бағасына байланысты болып отыр. Көпшілік электр желісін тұтынғаны үшін қанша тарифпен төлейді?
– Жергілікті тұрғындар 2024 жылдың тамыз айына дейін 1 квт/с үшін 21,17 теңге төлесе, есепті мерзімде көпшіліктен 25,36 теңге алынып келеді. Иә, бізге де бір ай көлемінде төленетін коммуналдық төлемнің көбеюіне байланысты шағым түсуде. 2025 жылы тариф бағасы белгіленген мөлшерді сақтап қалды. Қазіргі нарықтық кезеңде мекеменің материалдық шығынын өтеу мақсатында тариф бағасында өзгеріс болады. Сонымен қатар жергілікті халық тұрмыстық техниканы жиі пайдалануы кезінде электр қуатын артық тұтынуы мүмкін. Сондықтан бір айлық мөлшері көбейіп кетіп жатады. Мұндайда мекеменің төлем қабылдау мамандарымен есептесіп, анық-қанығына көз жеткізген дұрыс.
– «Шиелі жарығы» мекемесінің мамандары толықтай өз орнын сақтап қалды ма? Бүгінде жұмыс барысы қалай үйлестіріліп келеді?
– Айта кету керек, 2025 жылдың қаңтар айында «Шиелі жарығы» мекемесі жабылып, ондағы 11 маман біздің ұжымға қосылды. Барлық маман өз орнында. Жұмыс барысында ешқандай қиындық туындап жатқан жоқ. Сырдария ауданында «Шиелі жарығы» мекемесі 18 жыл жұмыс істеді.
– Электр энергиясына қарызы бар жандарға қандай шара қолданылады?
– Электр қуатын тұтынған жергілікті тұрғын үй иесіне берешегі бар жөнінде ескерту беріледі. Егер де ескертуді елеместен, 30 күн бойы қарызды кешіктірген жағдайда жарық есептегіш құрал мен электр бағанасынан қиылады. Жергілікті тұрғындар электр желісі үшін берешегін уақытынан кешіктірмей, төлесе дейміз.
– Бұл ретте, заңды сұрақ туындайды. Электр желісін қайта қосу үшін тұрғындар қанша теңге төлейді?
– Есептегіш құралдан және электр бағанынан қиылса, тұрғындар арнайы тариф бойынша төлеуге міндеттеледі. Өз кезегінде тариф бағасын тек көпшілік мекемеге келіп біле алады. Осы ретте, маңызды ақпар қоса кетейін. Кез келген тұрғын 8 жылда бір мәрте есептегіш құрылғысын сынақтан өткізіп, ауыстырып тұруы керек.
Балтабай ОРДАБЕКОВ
Фото: Ашық дереккөзден
