Электр энергиясының тарифы өзгереді
![](/uploads/posts/2024-07/medium/1721107702_14554.jpg)
Жария тыңдауға Қазақстан Республикасы Ұлттық экономика министрлігі Табиғи монополияларды реттеу комитетінің Қызылорда облысы бойынша департаментінің табиғи монополияларды және бағаларды реттеу бөлімінің басшысы Самал Ахметова, «Шиелі Жарығы» ЖШС-і директорының уақытша міндетін атқарушы Жорабек Сәдібеков, үкіметтік емес ұйымдарының өкілдері және тұтынушылар қатысты.
«Шиелі Жарығы» ЖШС-і директорының уақытша міндетін атқарушы Жорабек Аманкелдіұлы электр энергия бағасының өзгеруінің негізгі себептеріне тоқталды.
– Бағаның негізгі өсуі – біріңғай сатып алушыдан электр энергиясын сатып алу бағасының 16,5 пайызға, электр энергиясын тасымалдау тарифтерінің «ҚТЖ» ҰК» АҚ-ның 12,8 пайызға, «ҚЭТТК» АҚ-ның 26,9 пайызға және «KEGOC» АҚ-ның ұлттық электр желісін пайдалану бойынша қызметінің тарифі 2,9 пайызға өзгеруіне байланысты. Жүктемені көтеруге электр қуатының дайындығын қамтамасыз ету қызметі бағасының 2,9 есеге өсуі, жабдықтаушы үстеме ақы мөлшерінің 1 кВт.сағатқа 1,05 теңгеден 1,47 теңгеге артуы болып табылады. Осыған байланысты «Шиелі Жарығы» ЖШС-і электр энергиясымен жабдықтау қызметі бағасының алдағы уақытта көтеру туралы ақпарат ұсынылады. «Шиелі Жарығы» ЖШС-нің электрмен жабдықтау қызметінің жобалық орташа босату бағасы КҚС-мен 1 кВт.сағ 24,26 теңгені құрады немесе 28,4 пайызға өзгереді, – деді.
Айту керек, қазіргі кезде Департаментпен бағалардың өзгеруін негіздеуге ұсынылған құжаттарға сараптама жүргізілуде. Сонымен қатар жария тыңдауда айтылған ескертпелер мен ұсыныстар ескеріліп, түпкілікті шешім қабылданбақ.
«Тт» ақпарат