Мерекелік іс-шара өткізілді

30 тамыз – ҚР Конституциясы күні мерекесі қарсаңында Сырдария аудандық қорғаныс істері бөлімінде мерекелік іс-шара өткізілді. Іс-шараға аудан әкімдігінің, ауылдық округі әкімі аппараттарының, тиісті бөлім, мекемелердің жауапты мамандары мен ардагерлер қатысты.

Іс-шарада Сырдария аудандық қорғаныс істері бөлімінің бастығы, подполковник Жомарт Прназаров құттықтау сөз сөйледі.

– Жалпыұлттық референдум арқылы жаңартылған Конституциямыз ұлтты біріктірудің нағыз символына айналды. Сондай-ақ негізгі заңымыз елдің саяси жүйесін демократияландыруды, заң үстемдігін қамтамасыз етуді және халықтың әл-ауқатын арттыруды көздейтін ауқымды өзгерістердің берік тұғыры саналады. Конституциямызға құрмет көрсету – әрбір адамныңбасты парызы. Біздің басты құндылықтарымыз – Тәуелсіздігіміз, Ата Заңымыз бен бірлігіміз нығая берсін, – деп атап өтті бөлім бастығы.

Мұнан соң аудан әкімі аппаратының бөлім басшысы Қ.Қуандықов сөз сөйлеп, Ата Заң – мемлекеттің іргетасын бекітумен қатар әлеуметтік-экономикалық, қоғамдық-саяси дамуының басты бағдары екенін айтты. Іс-шара барысында Ауған соғысының ардагері Ж.Нарымбетов, ауылдық округі әкімі аппараттарының әскери есеп мамандары А.Асқаров, З.Махашева, Л.Жарасбай, Т.Арыстанбек, Е.Асқаров аудандық қорғаныс істері бөлімінің бастығының Алғыс хатымен марапатталды.

Ақтөре ИБРАГИМҰЛЫ