Алғыс айтамыз
Қызылорда облыстық мәслихатының депутаты, Сырдария ауданының Құрметті азаматы Бақдәулет Мақашев 60 ардагердің мекен жайына аудандық газетті демеушілікпен жаздыртып берді. Бұл ардақты азаматтың сырдариялық ардагерлерге деген құрметі екені анық.Сыр жұртшылығы «Жан-Арай» серіктестігінің директоры Бақдәулет Еркінбекұлының жомарттығына, мәрттігіне, азаматтығына қанық екені белгілі. Талайға шапағаты тиген азамат Сырдария ауданының әлеуметтік-экономикалық дамуына да еңбек сіңіріп келеді. Бірер жыл бұрын пандемия кезеңінде аудандық ауруханаға оттегі баллондарын алып беріп, мұқтаж отбасыларға көмегін үлестірді. Сондықтан ел алғысын арқалаған азаматқа «Сырдария ауданының Құрметті азаматы» атағының берілуі адал еңбекке берілген лайықты баға деп білеміз.
– Сыр өңірінің дамуына қолымыздан келгенше өз үлесімізді қосып келеміз. Кәсіпкерлік саласында еңбек етіп, халықты жұмыспен қамтып, тапқан-таянғанымызды көпшілікпен бөлісудеміз. Әрине, меценат атану – мақсат емес. Бұл – біздің азаматтық парызымыз. Оның үстіне халық қалаулысы болған соң әлеуметтік жауапкершілікті терең сезінеміз. Лайым, елімізде мұқтаж отбасылардың саны азайып, халықтың әлеуметтік жағдайы арта берсін. Ал аудандық газеттен жаңалықтарды оқып, атқарылып жатқан жұмыстармен танысуы үшін сырдариялық 60 ардагердің мекен жайына 2024 жылдың бірінші жартыжылдығына басылымды жаздыртып беруіміз – ардагерлерге деген құрметіміз, ықыласымыз. Бұл жұмыс дәстүрге айналды десек те болады және жалғастыра беретініміз анық, – дейді кәсіпкерліктің көшін өрге сүйреп келе жатқан іскер азамат.
Облыстық мәслихат депутатының аудандық газет таралымының артуына көрсеткен қолдауын «Тіршілік тынысы» газеті редакциясы жанындағы бастауыш ардагерлер ұйымының төрағасы, Қазақстан Журналистер одағының мүшесі Мүсілім Қалмұратұлы жоғары бағалап, өз алғысын білдірді.
– 2019 жылдан бастап ардагерлердің мекен жайына демеушілікпен тегін газет жаздыртып беру жұмыстары қолға алынып, нақты жұмыстар жүргізілуде. Редактордың ұсынысына қолдау білдірген кәсіпкер азаматтардың қолдауымен біздің де мекен жайымызға аудандық газет тегін келіп жатыр. Бұл бастамаға соңғы бес жылда Бақдәулет Еркінбекұлы қолдау көрсетіп келеді. Биыл да сол жұмыс жалғасын тапты. Сондықтан кәсіпкердің жұмысына жеміс тілейміз. Ол ауданның Құрметті азаматы деген атқа лайықты іс жасап, өзге азаматтарға үлгі-өнеге көрсетуде, – дейді аудандық газет редакциясы жанындағы бастауыш ардагерлер ұйымының төрағасы Мүсілім Қалмұратұлы.
Жанашыр азаматтың редакцияға, аудандық газетке деген қолдауын, қазақ баспасөзіне қолдауы деп түсініп, Б.Мақашевқа редакция ұжымы мен қаламгерлердің атынан зор денсаулық, абырой-амандық тілеп, біз де шынайы алғысымызды білдіреміз.
Ақтөре ИБРАГИМҰЛЫ
