Қазақстанның еңбек сіңірген қайраткері атанды

Белгілі қаламгер, аудандық газеттің бұрынғы бас редакторы Дайрабай Тынышбек Майлыбайұлы Қазақстанның еңбек сіңірген қайраткері атанды. Мемлекет басшысының Жарлығымен берілетін мемлекеттік марапаттың ардақты азаматқа табыс­талуын сырдариялықтар зор қуанышпен қабылдады.

Сыр өңірі­нен шық­қан атақты би, батыр, шешен, жыраулардың шығармаларын жинаумен айналысып, ұзақ жылдар іргелі ізденіс жұмыстарын жүргізген Тынышбек Дайрабайдың есімі тарих, әдебиет, мәдениет, журналистика салаларында құрметпен аталады. Бүгінде Алматы қаласында тұратын сырбойылық қаламгер бұрынғы Тереңөзек ауданының аудандық «Еңбек туы» газетінде бөлім меңгерушісі, редактор, «Қараөзек» кеңшарының партком хатшысы, Тереңөзек аудандық партком бөлімінің меңгерушісі, аудандық атқару комитеті төрағасының орынба­сары, аудан әкімінің орынбасары қыз­меттерін абыроймен атқарды. Сондай-ақ халықаралық «Түр­кістан» газетінде жемісті еңбек етіп, өзінің ғылыми, тарихи-танымдық сараптамалық мақалаларын республикалық газет-журналдарға жариялап, ел тарихын түгендеуге айрықша үлес қосты.

Қаламына құт қонған қаламгер өзі­нің еңбек жолында «Тоғанас батыр», «Қаңлы Жүсіп», «Кете Шөмекей ше­жіресі», «Тереңөзек», «Тұғыры биік тұлға», «Қорқыт Ата» энциклопедиясы, «Төребай», «Кете Жүсіп», «Дүр Оңғар», «Мұ­зарап ақын», «Сырдың сырлы сыры», «Түркістан альбомы», «Ақын Қуаныш Бай­мағамбетов», «Сырдария ауданының шежіресі», «Сыр перзенттері», «Билер сөзі – киелі», «Жеті тараудағы – жеті анық» еңбектерінің авторы атанды. Ол сондай-ақ  ҚР Мәдениет қайраткері, Сырдария, Қармақшы, Жалағаш аудан­да­ры­ның «Құр­мет­ті азаматы» атағының иегері ретінде зор құрметке ие.

Респуб­лика күні мерекесінде Мемлекет басшы­сының Жарлығымен марапатталып, қажырлы еңбегі лай­ықты баға­ланып жат­қан қаламгерді Қазақстанның еңбек сіңірген қайраткері атануымен шын жүректен құттықтаймыз. Биыл 80 жасқа толып, айтулы мерейтойына абыроймен жеткен ардақты азаматқа сырдариялық жерлестерінің атынан зор денсаулық, шығармашылық сәттілік тілейміз.

Айта кету керек, Т.Дайра­байдың 80 жылдығы аудан әкімдігінің қолдауымен ауданымызда қараша айында аталып өті­леді деп жоспарлануда.

А.ИБРАГИМҰЛЫ