Шекара қызметіндегі қырағылық

Тартылған теңізді өлкеден бастап Қызылды бойлай Жаңақорған жеріне жетіп жатқан шекара шебі Қызылорда облысына тиесілі. Ұзындығы – 745 шақырымнан астам. Құмды әрі шөлейтті өлке. Мұндай жерді кірпік қақпай күзету тек біздің қайсар шекарашыларға ғана тән.

ҚР Ұлттық Қауіпсіздік Комитеті Төрағасы­ның 1999 жылғы 15 қыркүйектегі бұйрығына сәй­кес, Қазақстан Респуб­ликасының оңтүстік бағыттағы Мемлекеттік шекарасын нығайту мақсатында және Қазақстан Республикасы ҰҚК Шекара қызметінің даму бағдарламасына сай шекарашылар тұрақты қызмет атқарып келеді. Аймақтағы департамент сол жылдан бастап Өзбекстанмен арадағы шекараны нығайту, елдің саяси және экономикалық мүдделерін қорғау, заңсыз көшіп-қонудың алдын алу, қазақ еліне қару-жарақ, оқ-дәрі, есірткі мен радиоактивті заттарды заңсыз кіргіз­беу міндеттерін мінсіз атқаруда деп айтуға толық негіз бар.

Биыл Шекара қызметінің құрылғанына 31 жыл толды. Ведомстваның құрылуына, өркендеуіне, оның дамуына, халық арасында оңды пікірін қалыптастыру мен имиджін нығайтуда әскери қызметшілермен қатар, шекаралық аймақтардағы жергілікті тұрғын­дардың, әкімдіктер мен тағы да басқа азамат­тардың қосып келе жатқан еңбектері өлшеусіз.

Ұлттық қауіпсіздік мүддесін арттыру жұ­мыс­тарына жіті көңіл бөліп, шекарашылармен бірлесе жан-жақты жұмыстар жүргізіп жатқан аза­маттардың орны бөлек.

Мемлекеттің басты нышандары – елтаңба, ту, әнұран болса, төртінші нышаны – шекара. Әр елдің іргесі шекарадан басталады. Кез келген мемлекеттің дамуы, оның тыныштығы мен тұрақтылығы – шекарасының мызғымас беріктігінде. Жұрт ұйқыда жатқанда, елдің шетінде, желдің өтінде кірпік қақпай күзететін шекарашылардың еңбегі ерлікпен тең, абыройлы, қасиетті міндет.

Бүгінгі күнде қорғаныс және қауіпсіздік жағын үйлестіру, оның ішінде аудандағы шекара бөлімі, бұрынғы комендатура мен оған қатысты шекара бөлімшелерімен тығыз жұмыс атқарып келеміз. Бұл жұмыстар аудан бас­шысының әркез бақылауында және жан-жақты қолдауына ие.

Елдің ел болуы, халықтың бейбіт өмір сүруі оның шекарасының беріктігіне байланысты. Осы орайда аудан әкімдігі шекарашылармен бірлесіп көптеген іс-шараларды жүзеге асырып келеді. Мұның бәрі Тәуелсіздігімізді нығай­татын, егемендігімізді еңселі ететін қадамдар.

Ауданымыздың негізгі үш ауылдық округі ше­кара аумағымен шектесіп жатыр. Аймақтағы қауіп­сіздікті қамтамасыз ету мақсатында жыл сайын барлық күштік құралымдар мен жер­гілікті атқару органдарының қатысуымен үйлесу кеңестері ұйымдастырылып тұрады. Кездесуде шекарашылардың айтылған негізгі мәселелері назарға алынып, қандай да болмасын өзгерістер мен жаңашылдықтар болып жатқан жағдайларда ұсыныс-пікірлері ескеріліп, бір жылдық жоспарға енгізіп отырамыз. Ақпараттандыру жұмыстары да қатар жүргізілуде.

Ел шебінде қауіпсіздікті нығайту аясындағы жоспарға сәйкес, аудандағы елді мекен­дердің жергілікті азаматтары қатарынан ерікті жасақтарды құраймыз. Заң бұзушы­лықтардың алдын алу үшін жылына кем дегенде екі мәрте шекаралық аймақтарда тұра­тын жер­гілікті тұрғындармен бас қосып, жиналыстар өткіземіз. Оларға шекаралық аймақта уақытша болу, жүріп-тұру және жұмыс жасау­­да белгіленген режимдік талаптарды сақтау тәртібін жеткіземіз. Өз еліңнің іргесін өзің күзетуің – заңды құбылыс. Сондықтан да, шекарашылармен тығыз қарым-қатынаста болсақ қана – ел дамуы алға жылжиды.

Сонымен қатар, жергілікті тұрғындар ара­­сында шекарашылар туралы оң пікі­р қалып­тастырып, өскелең ұрпақтың бойында отансүйгіштік қасиеттерін арттыру мақсатында түрлі іс-шаралар атқарылуда.

Шекара – ата-бабамыздан қалған баға жетпес асыл мұра. Сондықтан әр адам тәуелсіздігін көзінің қарашығындай сақтауы міндетті.

Әр адамның ұйқысының тыныштығын күзетіп жүрген шекарашыларды төл мере­келерімен шын жүректен құттықтаймыз. Қиындығы мен жауапкершілігі зор қыз­меттеріне абырой тілейміз. Ең бастысы – ел іргесі аман, заманымыз тыныш, шекарамыз берік болсын!

Қайрат ҚУАНДЫҚОВ,
Сырдария ауданы әкімі
аппаратының жұмылдыру дайындығы және аумақтық
қорғаныс бөлімінің басшысы

Фото: ашық дереккөзден