Тіршілік тынысы Tirshilik-tynysy.kz ақпараттық агенттігі
» » Ерлігі елге ұран

Ерлігі елге ұран

Жақында облыстық Полиция департаментінің бастығы, полиция генерал-майоры Махсудхан Аблазимов ауданға жұмыс сапарымен келіп, оның барысында бейбіт өмірде қоғамдық қауіпсіздікті сақтауда жан пида еткен ІІ дәрежелі «Айбын» орденінің иегері Талғат Қозыбаевтың ескерткішіне гүл шоғын қойып, үнсіздікпен еске алды. Бейбіт күннің ба­тырының есімі берілген №131 орта мектептегі мұражайымен танысып, ерлігіне тағзым жасалды.

Аталған мектептің түлегі ерлік көр­сетіп, небәрі 25 жасында қаза тапты. Оның ерлігіне құрмет көрсетіліп, өзі оқы­ған мектепке, өзі тұрған көшеге есімі беріл­ді. Сондай-ақ Шиелі ауданы Тартоғай ауы­лында және аудан орталығында оның есімімен аталатын көшелер бар. Ал 2007 жылы №131 орта мектеп ауласында ес­керт­кіш орнатылды. Оның авторы – елі­мізге белгілі мүсінші Жаркен Исмағұлов.

ІІ дәрежелі «Айбын» орденінің иегері­не білім ошағында мұражай жасақталған. Мектептің екінші қабатындағы музейдің іші қыршын кеткен қаһарманның балалық шағынан бастап қызметтік бабына дейін­гі кезеңін қамтитын фотосуреттермен­ жа­сақталған. Мектеп қабырғасында жүр­ген­де алған мақтау қағазы, қызмет ба­ры­сындағы қырағылығы үшін берілген Құрмет грамотасы, арнайы дипломдар да музейге қойылған. Оған қоса бұл жерден Т.Қозыбаевтың киген қызметтік киімін де көруге болады. Сондай-ақ оның ерлі­гі туралы жазылған Қазақстан Журналистер Одағының мүшесі Шаһарбек Нұрсейітов­тің «Жалындап өт­кен жиырма бес» кітабы тұр. Қырағы сақ­шының есімі енгізілген «Сыр өңірінің сақшылары», «Сыр бойының сақшылары» жинақтарын да музейден табасыз. Музейге өзі тұтынған спорттық құ­ралдары да қойылған.

– Біздің мектеп ел тыныштығы үшін ер­лік көрсеткен Талғат Қозыбаевтың есімі­мен аталады. Оның ерлігі жөнінде біз әрбір мектеп оқушысына үнемі насихат­тап келеміз. Сол мақсатта мектепте музей жасақталған. Музейді өскелең жас ұрпақ көріп, білім ошағы сондай қаһар­манның есімімен аталатынын мақта­ныш­пен айтады. Және осында іс-шаралар ұйым­­дастырылып тұрады. Әр жыл бейбіт күннің батырын еске алу іс-шарасы ұйым­дастырылып, онда көпшілік мектепке ке­ліп, тағзым етеді, музейді көреді. Аудан­дық полиция бөлімімен бірлескен іс-ша­ралар өткізіліп тұрады. Батыр ерлігі елге ұран, – дейді мектеп директоры Айнұр Әлиева.

Мектептен соң полиция генерал-майо­ры Талғат Қозыбаев шаңырағына барып, батыр ұлды тәрбиелеген әкесі Есентай Қозыбаевтың жағдайын сұрады. Қай­­сар тәртіп сақшысының ерлігі құқық қор­ғау қызметкерлеріне үлгі екенін айтып, алғыс білдірді. «Адамзаттың өмірін аман сақтаймын деп антына берік болып, еліне адал қызмет етуде өзгенің өмір­і үшін жанын қиған әріптестеріміздің ер­лігі мен батырлығы біздің есімізде мәңгі сақталады. Бүгінгі полицейлер үшін оның ерлігі – патриотизм мен жанқиярлықтың үлгісі» деді Махсудхан Нұғманұлы.

Өз кезегінде ерекше ілтипат көрсеткен аймақтың тәртіп сақшыларына батырдың әкесі Е.Қозыбаев ризашы­лығын жеткізді.

– Қызметте қырағы болудың үлгісін Талғат балам көрсетіп кетті. Сондықтан оның ерлігі ұмытылмайтынына сенемін. Жыл сайын ұлымды еске алуға арналған іс-шаралар өткізіліп, құрмет көрсетіледі. Жаңа қызметке тағайындалғанда аудан­ға келіп, ұлымның ерлігіне тағзым етіп жат­қаныңызға алғысым шексіз. Қызметте­ріңізге абырой тілеймін. Әркез елімізде ты­ныштық болуын тілеп отырамын, – деді ардақты қария Есентай Қозыбаев.

Бүгінде отбасының ақылшысы болып отырған Есентай аға шөбересін ба­ғып отыр. Немересі Алмат әкесінің жолын жалғап, Сырдария аудандық полиция бө­лімінде қызмет етуде. Аға тергеуші ретінде қылмыскерлерді құрықтауға өз үле­сін қосып келеді.

Е.БЕРКІНБАЕВ
20 мамыр 2023 ж. 192 0