Облыстың құрметті ардагері атанды

Қызылорда қаласындағы Достық үйінде облыстық ардагерлер­ ке­ңе­сінің кезекті отырысы өтті. Онда қо­ғам­дағы бірқатар өзекті мәселелер талқы­ланып, оны іске асырудың ­жолдары сөз етілді.

Жиынға облыс әкімі аппаратының басшысы Шахмардан Байманов, облыстық жергілікті атқарушы органдардың басшылары, ардагерлер қоғамдық ұйымының жетекшілері, тұрақты комиссия мен салалық ардагерлер кеңесінің төр­ағалары қатысты. Ауданымыздан аудандық ардагерлер кеңесінің төрағасы М.Келдібаев арнайы қатысып, жиында айтылған басым бағыттар мен маңызды міндеттерде сырдариялық ардагерлердің үлес салмағы айрықша екені айтылды.

Ардагерлер ұйымдарының басты міндеті – қарт адам­дар­дың әлеуметтік-құқықтары мен олардың міндеттерін қорғау. Бұдан бөлек, аймақтың арда­герлер ұйымы ел бо­лашағы жастарды патриотизмге тәрбиелеуді басты ұстаным ретінде қарастырады. Осы және басқа да мәселелер туралы кеңінен айтқан облыс әкімі аппаратының басшысы Шахмардан Байманов аймақ­тың қоғамдық-саяси ахуалын тұрақтандыруда және ұлта­ралық келісім мен татулықты нығайтуға облыстық ардагерлер кеңесінің үлесі зор екенін атап өтті.

– Облысымызда ардагерлер кеңесі мен бастауыш ұйым­дардың жұмысын жақсарту мақсатында тұрақты түрде көшпелі семинарлар ұйымдастырылуда. Бұл аға буын өкіл­дерінің әлеуметтік жағдайын жақсартуға және олардың мәселелерін оң бағытта шешуге ықпал етеді. Біздің басты мақсатымыз – ардагерлерге құрмет көрсету және ұрпақтар сабақтастығы негізінде жүйелі жұмыстарды жалғастыру, жандандыру. Бұл бағытта Сыр елінде аймақ басшысының ұйытқы болуымен іргелі істер атқарылып жатыр. Оның басы-қасында ардагер аға-апаларымыздың тілекші болып жүргені бізді қуантады. Сондай-ақ өңірде денсаулығына байланысты төсек тартып жатқан, әлеуметтік тұрмысы төмен, жалғызбасты 54 үлкен буын өкілдері бар. Олардың үйіне барып хал-жағдайын сұрау және барынша көмек көрсету шаралары үздіксіз жүргізілуде, – деді Шахмардан Асқарұлы.

Басқосуда 70-тен аса белсенді ардагер «Қызылорда облысының құрметті ардагері» төсбелгісімен марапатталып, құрмет төрінен көрінді. «Облыстың құрметті ар­да­гері» төсбелгісімен ауданымызға белгілі ұстаз, мем­лекеттік қызмет саласының ардагері Ұлмекен Жаналиева ­­да марапатталды.

Марапат иесі өзінің саналы ғұмырын ұрпақ тәрбиесіне, ауданның қоғамдық-саяси, рухани-мәдени дамуына арнап келеді. Сонымен қатар «Сырдария ауданының әйелдері» қоғамдық бірлестігін де басқарып, отбасы құндылығын нығайту, әйел-аналардың рөлін арттыру, ашық азаматтық қоғам қалыптастыру бағытында да зор еңбек сіңіруде. Ол сондай-ақ «Сырдария ауданының Құрметті азаматы» атағының иегері.

Редакция ұжымы ардагерлік кезеңге абыроймен жеткен Ұлмекен Шанайқызын «Қызылорда облысының құрметті ардагері» төсбелгісімен марапатталуымен құттықтап, зор денсаулық, мол бақыт тілейді.

А.ҚҰРМАНАЙТЕГІ