Аудан әкімі мәслихат депутаттарымен кездесті

Аудан әкімі Мұрат Ергешбаев Сырдария аудандық мәс­лихатының VII шақырылымдағы депутаттарымен кездесті. Кездесуге депутаттардан бөлек бөлім, мекеме басшылары, кент және ауыл әкімдері қатысты.

Аудан басшысы депутаттарға аудан­ның әлеуметтік-экономикалық мәселе­лерін шешіп, саяси және экономикалық реформаларды жүр­гізуге белсенді атса­лыс­қаны үшін ризашылығын білдірді.

– Атқарушы және өкілді органның басты міндеті – халыққа сапалы қыз­мет көрсету. Бұл бағытта ауданымызда қалыптасқан жүйелі жұмыстар бар және оның бәрі нәтижелі істермен аяқ­талуда. Депутаттық мандатты иеле­ніп, халық сенімін арқалау – үлкен құрмет және жауапкершілік. Сіздер сол құрмет пен жауапкершілікті терең сезіндіңіздер. Аймақ басшысының жә­не өздеріңіздің қолдауларыңыздың ар­қа­с­ында ауданның әлеуметтік-эко­но­микалық жағдайын жақсарту бағы­тын­да кешенді жұмыстар жүзеге асырылды. Екі жыл көлемінде аудандық мәслихаттың маңызды сессиялары өт­кізіліп, нақты шешімдер қабылданды. Сес­сияларда аудан тұрғындарын аяқ сумен қамтамасыз ету, білім беруді дамыту, қоғамдық қауіпсіздікті сақтау және аудандық бюджетті талқылау секілді маңызды мәселелер қаралды. Мұнда әрқайсыңыздың қосқан үлестеріңіз зор, тұрғындардың өтініштері мен сұра­ныстарын мұқият қарап, олармен жиі кездесу ұйымдастырып, билік пен халық арасында алтын көпір бола біл­діңіздер, – деген аудан әкімі алда үлкен саяси науқан келе жатқанын тілге тиек етті. Сонымен қатар жаңадан сай­ланатын депутаттар да осындай қар­қынды жұмысты жалғастырып, ау­данның жан-жақты дамуына және ин­фра­құрылымның жаңғыруына өзіндік үлесін қосатынына сенім білдірді. Мұнан соң аудан дамуына қосқан үлесі үшін де­путаттарға аудан әкімінің алғыс ха­ты тапсырылды.

Келелі басқосу қорытындысында ау­дандық мәслихаттың төрағасы Ержан Әжікенов сөз алып, депутаттарға құр­мет көрсеткен аудан басшысына алғы­сын, елдік мүдде жолында елеулі еңбек еткен әріптестеріне ықылас-пейілін жет­кізді.

«Тт» ақпарат