Колледжге есімі беріледі

Облыстық мәслихат сессиясында Қазақстан Республикасы Үкіметінің жанындағы Республикалық ономастика комис­сиясының қарауына Қызылорда облысының білім беру жә­не мәдениет ұйымдарына атау беру жөніндегі ұсыныстар қа­рал­ған болатын.

Сессияда облыстық қоғамдық даму бас­қармасының басшысы мәслихат депутаттарына осы күнге дейін өңірлік ономастика комиссиясының отырыс­тарында қолдау тапқан тиісті басқарма­лардың ұсыныстарын жеткізді.

Айтылған ұсыныстардың ішінде Сырдария аграрлы-техникалық колледжіне Балдырған Мұстапаеваның есімін беру де бар. Депутаттардың қолдауын алған ұсыныс ал­дағы уақытта Республикалық ономастика комиссиясында қаралады. Бұл бастаманың қол­дау тауып, одан әрі республикалық оно­­мастикалық комиссияда қаралатынына кол­ледж ұжымы ризашылықтарын біл­діруде.

– Аталған мәселені өткен оқу жылында «Сырдария ауданының әйелдері» қоғамдық бірлестігінің төрайымы Ұ.Жанәлиеваның баста­масымен ауданның бір топ еңбек арда­гері колледжге келіп, ұжыммен жиын өткізіп, ұсыныстарын білдірген болатын. Сол жиында ұжым қызметкерлері ұсынысты толық­тай қолдады. Одан әрі ұстаздар қа­уымы Балдырған Мұстапаеваның шаңы­ра­ғында болып, ұрпақтарымен кез­десті. Аналары туралы жиналған көптеген мағлұ­маттар, құнды құжаттар мен наградаларын көрсетті. Жинақталған мәліметтер негізінде облыстық білім басқармасына колледждің атынан жиын хаттамасы жіберілді. Міне, көп уақыт өтпей есімі елге белгілі Социалистік Еңбек Ері Балдырған Мұстапаеваның есімін беру туралы ұсынысты облыстық мәслихат депутаттарының қолдағанын естіп, қуанып отырмыз. Б.Мұстапаева күріш егіп, әр гектарынан 100 центнерге дейін өнім алып, рекорд орнатқан. «Еңбек Қызыл Ту», екі мәрте «Ленин» ордендерімен, «Еңбектегі ерлігі үшін», «Тың жерлерді игергені үшін» медальдарымен марапатталған және Қазақстан Коммунистік партиясы Орталық Комитетінің 14,15-съездерінде делегат бол­ған. Ауданның атын республикаға танымал еткен атақты күрішші. Қазақстанның «Алтын кітабына» енген еңбек майтал­манының есімі мәңгі ұрпақ жадында қала­тын болады, – дейді колледж директоры Дархан Қожахметов.

Айта кету керек Сырдария аграрлы-техни­­калық колледждің 50 жылдық тари­хы бар. 1969 жылдан бастап аудан ша­руа­­­шылықтарына қажетті мамандар даяр­­лау­мен айналысып келеді. Типтік жоба­мен салынған ғимаратта оқу кор­пусы, шебер­ханалар блогы, асхана, спорт, акт зал­дары, сыртқы спорт алаңы, тағы басқа қосымша жайлары, 68 орындық жатақ­ханасы бар. Үш қабатты еңселі ғимарат – 450 орындық. Мұнда 12 мамандық­қа 22 біліктілік бойынша студенттер білім алады.

Бибісара ТАҢАТАРҚЫЗЫ