Депутаттар ауданның басқару схемасын бекітті
Кеше аудандық мәслихаттың кезектен тыс 27-сессия өтіп, оған депутаттардан бөлек аудан әкімі М.Ергешбаев, аудан әкімінің орынбасарлары, аудандық ардагерлер және қоғамдық кеңес төрағалары, бөлім басшылары мен кент және ауыл әкімдері қатысты.Сессия басталмас бұрын аудандық мәслихат депутаты Дархан Ералиевтің төрағалығымен тұрақты комиссиялардың бірлескен отырысы өтті. Отырыста бірқатар мәселелер кеңінен талқыланып, депутаттардың ұсынысымен бес мәселе сессия қарауына ұсынылды. Сессияны аудандық мәслихат төрағасы Ержан Әжікенов ашып, күн тәртібімен таныстырды.
Күн тәртібіндегі бірінші және екінші мәселелер бойынша аудандық сайлау комиссиясының төрағасы Б.Өтегенова хабарлама жасады. Ол аудандық мәслихаттың №272, 273 шешіміне өзгерістер енгізуді ұсынып, аудандық сайлау комиссиясы құрамынан Д.Әлшеров шығарылып, орнына Ә.Парзу енгізілді, сондай-ақ учаскелік сайлау комиссияларының құрамына ішінара өзгерістер жасалды.
Үшінші мәселе бойынша аудандық мәслихат аппаратының бөлім басшысы Г.Еспенбетова түсініктеме жасап, ауданның округтік сайлау комиссияларының құрамы бекітілді. Атап өту керек, енді ауданда 12 округтік сайлау комиссиясы болады және әрқайсысында 5 азаматтан комиссия мүшесі болып табылады.
Сессияда қаралған келесі мәселе аудандық мәслихат аппаратының ережесін бекітуге арналды. Бұл туралы аудандық мәслихат аппаратының бас маманы А.Сәдуақасов баяндама жасап, ережедегі «мәслихат хатшысы» деген сөздер «мәслихат төрағасы» болып өзгертіліп жатқанын айтты.
Соңғы мәселе бойынша аудан әкімі аппаратының персоналды басқару (кадр қызметі) бөлімінің басшысы М.Жәмиев хабарлама жасап, ауданның басқару схемасын бекіту жөнінде баяндады. Депутаттардың қолдауымен басқару схемасына сәйкес енді ауданда сегіз бөлім жұмыс істейтін болды. Атап айтқанда, аудандық экономика және қаржы, ауыл шаруашылығы және жер қатынастары, мәдениет және спорт, қоғамдық даму, сондай-ақ кәсіпкерлік, өнеркәсіп және туризм, құрылыс, қала құрылысы және сәулет, тұрғын-үй коммуналдық шаруашылық, жолаушылар көлігі және автомобиль жолдары, жұмыспен қамту, әлеуметтік бағдарламалар және АХАТ бөлімі. Күн тәртібіндегі мәселелер толық тыңдалып, талқыланғаннан кейін тиісті шешім жобалары бекітілді.
Сессия соңында аудан әкімі Мұрат Ергешбаев сөз сөйлеп, ауданның әлеуметтік-экономикалық, қоғамдық-саяси дамуы жөнінде ақпараттармен бөлісті. Атқарылып жатқан және алдағы жұмыстар туралы айтып, бірлесе жүргізілген жұмыстарға қолдау білдірген депутаттық корпусқа алғысын білдірді.
А.ИБРАГИМҰЛЫ
