Аудан әкімінің мерекелік құттықтауы

Ардақты ағайын!

Құрметті сырдариялықтар!

Баршаңызды Қазақстан Республикасы Тәуелсіздігі күні мерекесімен шын жүректен құттықтаймын!

Биыл елімізде мерекелер күнтізбесіне өзгеріс енгізілгені баршаға аян. Осы рет­те, халқымыз ұлттық мерекені 25 қазан – Республика күні ретінде тойласа, 16 желтоқсан – Тәуелсіздік күні мемлекеттік мереке ретінде атап өтіледі. Мемлекет басшысы өз сөзінде бұл күнді «Тәуелсіздік алуға зор үлес қосқан ұлттық батыр­ларымызға тағзым күні ретінде атап өтуді» тапсырды.

Тәуелсіздік күні – еліміз үшін ең басты әрі ең ұлық мереке. Біздің бүгінгі же­ңістеріміз бен жетістіктеріміздің барлығы – арайлы Азаттығымыздың арқасы.

Әр ұлт, әр халық үшін Тәуелсіздіктен артық қасиетті де қымбат ештеңе жоқ. Осыдан 31 жыл бұрын тарихи таңдау жасап, мемлекеттік Тәуелсіздігін жариялаған Қазақстан Республикасы – бүгінде беделі биік, құқықтық, дербес, демократиялық мемлекет ретінде әлемге танымал. Ынтымақты ұран, татулықты ту еткен бейбіт халқымыздың осынау табысы, еліміздің қарқынды дамуы – тұрақты саясат пен ішкі бірліктің арқасы. 

Тәуелсіздік – біз үшін басымызға қонған бақыт және ата-бабамыздың сан ға­сыр күткен асыл арманы. Осы бақытымызды баянды ету үшін Тәуелсіздігімізді кө­зіміздің қарашығындай сақтап, елдік мүдде жолында еселі еңбек ету әр қа­зақстандықтың абыройлы міндеті болуы тиіс.

Қадірлі жерлестер!

Ауданның әрбір азаматы – бүгінгі ел өміріндегі осындай бағасы биік айтулы мерекені лайықты қарсы алу жолында аянбай еңбек етуде. Өйткені, күш-қай­ратын еселі еңбекке жұмылдырған, татулығы мен бірлігі терең тамыр жайған қа­сиетті Сырдария ауданы әрқашан да өзгелерге үлгі боларлық межелі биіктерден көрініп келеді. Олай болса, ынтымағы мен достығы жарасқан Тәуелсіз қазақ елі­нің бағын асырып, мерейін тасытатын ұлы істеріңізге сәттілік тілеймін!

Мерейлі мерекемен құттықтай отырып, отбасыларыңызға амандық, шаңырақ­тарыңызға шаттық, бақ-береке тілеймін!

Тәуелсіздігіміз тұғырлы, бірлігіміз баянды, еліміз еңселі болсын!

Құрметпен,
Мұрат ЕРГЕШБАЕВ,
Сырдария ауданының әкімі