Аудан жастарының белсенділігі жоғары
Жақында ғана Мемлекет басшысының пәрменімен жастар санатының шегі 35 жасқа дейін ұлғайды. Бұл Жаңа Қазақстанды дамытуда жастар толқынының үлес салмағы басым екенін, оларға артылар жауапкершілік зор екенін білдіреді. Осы бағытта, бүгінде аудан жастарының белсенділігі артты. Жыл бойына жарқын жұмыстарды атқарып, қоғамның қозғаушы күштері ауданның дамуына айтулы үлес қосуда.Тәуелсіздік күні мерекесіне орай аудан жастарының «Жетістікке жетелейтін Жаңа Қазақстан» тақырыбымен дәстүрлі ХІV форумы өтті. Жастардың қорытынды іс-шарасына аудан әкімі М.Ергешбаев, облыстық жастар ре-сурстық орталығының директоры Т.Тілес және жастар жанашырлары қатысты.
Форум басында құрметті меймандар «Білім ордасындағы жас ғалымдардың рөлі» тақырыбындағы жас ғалымдар көрмесімен танысты. Ауданның білімді жастары түрлі салада ізденіс жасап, ғылыми жобаларды қорғап келеді. Қазіргі ақпараттық қоғамда ІТ саласына да қызығушылық танытып, цифрландыру жүйесін меңгеруде. Олар ұлттық құндылықтарды заманауи үлгіге лайықтандыруды да назардан тыс қалдырмаған. Міне, сол ғылыми жобалар мен жетістіктер жыл қорытындысындағы жастар жиынының көрмесіне қойылды. Оны аудан басшысына аудандық жастар ресурстық орталығының директоры Нұрман Абдрасилов таныстырды.
Мұнан соң елді мекендердегі жастар бригадаларының жұмысын жандандыру мақсатында екіжақты меморандумға қол қойылды. Мұнда аудандық жастар ресурстық орталығының мұрындық болуыменмен Аманкелді және А.Тоқмағамбетов ауылы әкімдігі шаруашылықтарменекіжақты келісім жасады. Оның барысында елді мекендердегі жастар бригадасының жұмысына басымдық беріледі, оларға зор қолдау көрсетіледі. Тиісінше, жас буын өкілдері ауылдың өркендеуіне еңбек етеді.
Жастар форумының негізгі бөлімі «Волонтер» қойылымымен бастау алды. Бүгінде ерікті жастардың қарасы қалың. Өз еркімен қоғамға пайдасын тигізуді ойлайтын олар жақсылық жасауға бейімделген. Кішкене болса да көмек көрсетіп, алғыс алу жастар арасында үлгілі үрдіске айналып келеді. Бұл осы шақта мемлекеттік маңызға ие болып, оған үлкен мән берілуде. Жастар театры қойған қойылымның өне бойында ерікті болудың мән-маңызы көрсетілді.
Дәстүрлі жастар форумының ашылуында аудан әкімі М.Ергешбаев жас толқынды Тәуелсіздік күнімен құттықтап, ел дамуындағы жастардың рөліне тоқталды.
– Мемлекет басшысы «Қазақстан – дарынды жастар мекені. Ертең еліміздің абыройын асыратын да – осы талантты ұл-қыздар. Біз олардың өрісін ашып, қарым-қабілетін шыңдау үшін бар мүмкіндікті жасауға тиіспіз» деп бүгін мен болашақтың жүгін сеніммен жүктеді. Мұны ортақ мүдде деп қарастыруымыз керек. Ел ертеңі – жастарға тиесілі. Еліміздің абыройын асқақтату жолында кейінгі толқынның ықпалы қашанда үстем. Аудан жастарының барлық сала бойынша жетістіктері жетерлік. Оның ішінде спорт, білім, өнер, медицина салаларында ерекше қуаныштың бар екенін атап өткім келеді. Біздің мақтанышымыз, грэпплинг спорт түрінен әлем чемпионы Нұрдәулет Карбозов жуырда Испания мемлекетінің Понтаведро қаласында өткен Әлем чемпионатынан алтын медаль иеленіп, барша аудан жұртшылығын қуантты.
Жас мұғалім, республикалық «Жас ғалым – 2021» байқауы және облыстық «Үздік жас маман – 2022» байқауының жеңімпазы Піржан Төлеген сынды өз арамызда жүрген талантты жастарымыз жетерлік. Күні кеше ауданымыздың мақтанышы «Сырдария» квартеті Алматы қаласындағы «Жыл таңдауы – 2022» жұлдыздар фестивалінде «Үздік квартет» атанып, мәдениет саласының жетістіктерін еселеді. Біз ауданның абыройын асқақтатып жүрген жастарымызды мақтан тұтамыз! Баршаңызды жұдырықтай жұмылып, еліміздің, ауданымыздың дамуына аянбай үлес қосуға шақырамын. Жастық жалындарыңыз бен күш-жігерлеріңізді ауданның дамуына, өсіп-өркендеуіне жұмсайтындырыңызға сенемін! – деді Мұрат Нәлхожаұлы.
Негізінен, бүгінде жастарды қолдауға ерекше мән берілген. Соған байланысты жергілікті мемлекеттік органдарды бағалау көрсеткішіне «Жастардың даму индексі» қосылған. Сондықтан ауданда атқарылған игілікті шаралардың барлығында аудан халқының төрттен бірін құрап отырған аудан жастарының өзіндік үлесі бар.
Мәселен, ауданда қоғамдық және қайырымдылық істердің басында жас еріктілердің белсенділігі жоғары. Олардың көмегімен жыл басынан бері 1 отбасыға үй сатып алынып берілді және Қостанай облысына әлеуметтік көмек жіберілді. Мұнан соң ерікті жастардың қатысуымен 150-ге жуық мұқтаж отбасыға әлеуметтік көмек көрсетілген. Ал ауылдық округтерде жастар бригадалары құрылып, жұмыспен қамтылуда. Ал алдағы уақытта ауданда 500-ге жуық жасты жұмыспен қамту жоспарлануда. Соның нәтижесінде, жастар арасындағы жұмыссыздық деңгейі 3,9%-ға дейін төмендемек.
Құттықтаудан соң жыл қорытындысымен белсенді жастар арнайы марапатталды. Алдымен, биылғы саяси науқанда белсенділік танытқан сырдариялық жастар Қазақстан Республикасының Президенті Қ.Тоқаевтың, Республикалық қоғамдық штаб жетекшісі Е.Қошановтың, Қызылорда облысы әкімінің орынбасары Н.Сақтағановтың «Алғыс хатымен» марапатталды.
Ал жылдағы дәстүрмен әр салада жемісті еңбек етіп жүрген жастар аудан әкімінің «Өрлеу» жастар сыйлығының иегері атанды. Биылғы 10 жастың қатарында Бағлан Сағындықов, Әсел Көшербаева, Жәнібек Алтынбеков, Сейтжан Қайырбек, Арын Адай, Аружан Мұханбетқали, Қаракөз Сәрсенбекова, Шынар Ақназарова, Ұлбосын Мұхамбетқалиқызы және Нарқыз Балабекова бар.
Сонымен қатар аудан әкімінің арнайы «Ынта» сыйлығына Айдарлы ауылындағы жастар бригадасының бригадирі Зейнолла Сүндәтіллаұлы ие болды.
Мерелік іс-шарада облыстық жастар ресурстық орталығының директоры Т.Тілес сөз сөйлеп, Сыр жастарының атқарып жатқан жұмыстарына тоқталды. Оның ішінде, сырдариялықтардың белсенділігі жоғары екенін, барлық сала бойынша жетістікке жетіп келе жатқанын айтты. Алдағы жылы да аудан жастарымен ауқымды жұмыстар жүргізілетінін де жеткізді.
14 рет өткізілген жастар форумында патриоттық акция ұйымдастырылып, жастар «Біз біргеміз» әнін шырқады. Ұлттық жекпе-жектен Әлем және Қазақстан чемпионы Бейбітжан Қобланов жастарды елді қарқынды дамытуға үлес қосуға шақырды. Одан бөлек, жас өнерпаздар өнер көрсетіп, мерекелік көңіл-күй сыйлады.
Ердос СӘРСЕНБЕКҰЛЫ
