Билік халыққа есеп берді

Бұрын атқарушы билік халық алдында жылына бір рет қана есеп беретін. Ол және формальды түрде ұйымдастырылатын-ды. Бір са­ғаттық баяндама оқылады, бір кісі жауабы дайын сұрақ қояды, бір кісі бата береді. Сөйтіп, есеп беру жиын да қорытындыланады. Халық жауыр болған қалыптасқан үрдіс Президент пәрменімен бү­гінде түбегейлі өзгерді. Билік жылына бір рет емес, тоқсанына бір рет есеп беретін болды.

Аудан әкімі Мұрат Ергешбаев әр тоқсан сайын барлық ауылды аралап, халыққа есеп беріп жүргенінен аудан тұрғындары хабардар. Халық жиындары ашық, еркін форматта ұйымдас­ты­рылып келеді. Баяндама оқылмайды, шенділер сахнаның төрінде отырмайды. Аудан басшысы атқарылған жұмыстарды түрегеліп тұрып баяндап, халыққа тіке қарап тұрып жос­парларымен бөліседі. Қойылған сұраққа да сол жерде жауап беріп, болар істі болады, болмайтын істі бол­майды деп нақтысын айтады. Бұл – биліктің ха­лық­қа жақындай түскенінің дәлелі. Халық үні­не құлақ асатын үкімет дегеніміз осы шығар, бәл­кім. Біз кешегі аптада А.Тоқмағамбетов ауылы мен Тереңөзек кентіндегі есеп беру жиынына қа­ты­сып, осыны анық аңғардық.

Асқар Тоқмағамбетов ауылындағы жиын ауыл­дық мәдениет үйінде өтті. Ауылдың ірі бастылары жақсы жиналыпты. Әр көшенің белсенділерін көріп, ауылдың бүгіні мен ертеңіне алаңдайтын халықтың бар екеніне куә болдық. Аудан әкімі М.Ергешбаев өзімен бірге жиынға аудан прокурорының, аудандық мәслихат хатшысы мен депутаттарының, тиісті мекеме басшыларыларының қатысып отырғанын айтып, қандай да бір сұрақ болса бірге талқылап, жауабын бірге іздеуге биліктің дайын екенін айтты. Сонымен қатар ауданда жыл көлемінде атқарылған жұмыстарды тізбектеп, ауылдағы бірқатар көшенің жарықтандырылатынын, ауылдық емхананың күр­делі жөндеуден өткізілетінін де атап өтті. Әрі қа­райғы жиын сұрақ-жауап форматына ойысты.

Бірінші кезекте үлескерлер арасындағы жер да­уы мәселесі көтерілді. Алаңдаушылық білдірген тұрғындар әкімдікке өздерінің ұсыныстарын айтты. Бұл жөнінде аудан басшысы барлығы заң аясында реттелетінін айтып, әкімдік тарапынан тек құқықтық кеңес берілетінін, мәселенің нүктесін үлес­керлердің өздері қоятынын жеткізді. Иә, расында да солай ғой. Заңнан ешкім аттап кетпейді. Оның үстіне әкімдіктің сот ісіне араласып, бір та­раптың құқығын шектеп, бір тарапқа басымдық беруге құқығы жоқ. Ең бастысы, елдің бірлігі керек. Қалғаны заң аясында кезең-кезеңімен реттеледі. Бірақ халықтың жерін пайдаланып, несібесін арттырып отырғандар халыққа жағдай жасау қажеттігін де ұмытпауы керек. Аудан әкімі осыған назар аудар­ып, азаматтарды елдің, халықтың қамқоршысы болуға шақырды.

Жиында ірілі-ұсақты басқа да мәселелер көте­ріліп, оларға жауап берілгеннен кейін аудандық мәслихат депутаты Жұмабек Ембергенов сөз сөй­леді. Ол соңғы жылдары ауылдың бірлігіне сызат түсіп, тірлігі тұмандана бастағанына қынжылысын білдіріп, жер дауынан да жоғары құндылықтар бар екенін айтты. Оның ішінде сыйластық, аға­йын­гершілік, татулық ұғымдарына тереңнен тоқта­лып, нақты мысалдар келтірді. «Алтау ала болса, ауыздағы кетеді, төртеу түгел болса, төбедегі ке­леді» демекші, ауыл халқын бірлікке, өзара түсіністікке шақырды. Ақын атын иемденген ауыл­дың алдағы уақытта өсіп-өркендеп, дамудың даң­ғыл жолынан биікке құлаш сермейтініне сенім біл­­дірді. Сырттан келіп ешкім мәселені шешіп бер­мей­тініне назар аударып, халықтың бірлік, ынты­мақ ұғымдары аясында игі істерге топтасуына ті­лектес екенін жеткізді. Осылайша, есеп беру жиы­­ны өз деңгейінде қорытындыланып, атқарушы билік өкілдері аудан орталығына бағыт алды.

Тереңөзек кентінің халқы кент мәдениет үйіне жиналыпты. Мұнда да аудан ардагерлерінің қарасы қалың болды. Сондай-ақ биліктің есеп беру жиы­нына мекеме қызметкерлері де қатысты. Аудан әкімі әдеттегідей қарапайым тілде, ұғынықты түрде есеп беріп, атқарылған жұмыстар мен алдағы мақ­сат-міндеттерді саралады. Мұнан кейін халық сұрағын қойып, жауап алды. Тұрғындар кенттегі кә­сіпкерлік саласын дамыту, жаңа сауда орындары мен мал базарын ашу, сондай-ақ қайтарымсыз грант мәселесіндегі кейбір түйткілдер туралы айтты. Сұрақтар жауапсыз қалған жоқ. Аудан әкімімен қатар тиісті сала басшылары кеңінен түсіндірме берді. Көтерілген мәселелердің орындалуын аудан басшысы жеке бақылауына алатынын айтты.

Есеп беру жиыны барысында аудандық қоғам­дық кеңес төрағасы Марат Еспенбетов сөз сөйледі. Ол кенттің әлеуметтік мәселелерінен хабардар еке­нін айта келе, тұрғындарды аудан тазалығын қа­лыптастыруға бірлесе атсалысуға, кәсіпкерлерді халыққа сапалы қызмет көрсетуге шақырды. Мем­лекет тарапынан жақсы көмектер көрсетіліп жат­қанын айтып, соның бәрін дұрыс, тиімді пайда­лану қажеттігін жеткізді. Әкімдікке иек арта бермей, қолда бар мүмкіндіктер негізінде алға ұмты­лудың маңыздылығына назар аударды.

Жиын қоры­тын­дысында аудан әкімі әр мәселе хат­тамаланып, зерделеніп, тиісті шешімдер қабыл­да­натынын айтып, мекеме басшыларына нақты тап­сырма берді.

А.ИБРАГИМҰЛЫ