Еңбек адамдарына құрмет көрсетілді

Өмір сүріп отырған ортаның көркейіп, гүлденуіне, оның тазалығының сақталуына атсалысу – баршаға ортақ іс. Осыған орай Мемлекет басшысы Қасым-Жомарт Тоқаевтың бастамасымен «Birge: Taza Qazaqstan» республикалық эконауқаны жыл бойы жүзеге асырылуда. Аталған науқанға Айдарлы ауылдық округінің тұрғындары белсене атсалысты. Өз кезегінде ауыл көлемінде тазалық жұмысына үздіксіз қатысқан қызметкерлермен кездесу өткізілді. Кездесуде ауыл әкімі Айбол Ержанов сала мамандарына құрмет көрсетті.

Айта кетейік, облыс орталығында республикалық эконауқанға атсалысқан мамандарды облыс әкімі Нұрлыбек Нәлібаев арнайы марапаттады. Олардың қатарында Айдарлы ауылдық округіндегі мекеме қызметкерлері де бар. Атап айтқанда, қызметкерлер Перне Шауткенова, Нұрғали Жұмыров, Мейрамкүл Оспанова, Айнұр Досимова ерекше марапат төрінен көрінді.  

– Айдарлы ауылында «Birge: Taza Qazaqstan» республикалық эконауқанына жыл көлемінде белсенді атсалысқан жандар көп. Жылдың төрт мезгілінде тазалық жұмыстары тоқтамайды. Әрбір көшенің тазалығы басты назарда болады. Тынымсыз еңбектің өтеуі болуы тиіс. Біз қашанда қарапайым еңбек адамдарын қолдауға дайынбыз, – деді ауыл әкімі Айбол Ержанов.

Тазалыққа жауапкершілік таныту – баршаға ортақ. Сондықтан ауыл тазалығын сақтап, көркеюіне атсалысайық!