101 жастағы соғыс ардагері бірінші болып сайлауда дауыс берді

Ұлы Отан соғысының ардагері, 101 жастағы қария Яхия Тасыров бірінші болып сайлау учаскесінде дауыс берді.

Сырдариялық соғыс ардагері бірлікті ту етіп, елдің дамуына негіз болатын саяси науқанға әрбір азаматтың бей-жай қарамау қажеттігін айтты.

Майдангер 1922 жылы дүниеге келген. Ол сұрапыл соғыс басталғанда небәрі 19 жаста болған. Жастық жалыны мен күш-қайратын Отан қорғауға жұмсаған азамат соғыстың бас кезінде броньмен қалдырылған. Осы кезде Ленинградтан, Ресейдің басқа да үлкен қалаларынан тоқыма мата комбинаттары Ташкентке қоныс аударғаны белгілі. Себебі соғыс жағ­дайын­да олар эвакуацияланды. Бұл Таш­­­­­­­­­кент­тің тоқыма-мата комбинатының жұ­­­мыс ауқымының кеңеюіне әсер етті. Яхия Тасыров күндіз-түні жұмыс басы­нан табылды. Дегенмен 1941 жыл­дың желтоқсан айында тоқыма-мата комби­натының іргесіндегі Фрунзе аудандық әс­кери комиссариатына шақырылып, май­данға аттанады.

Айту керек, снаряд жарықшағы тиіп жа­раланған жауынгер Яхия Тасыров осы жолы «Қызыл жұлдыз» орденіне ұсы­ны­­­лады. Бұл награда Я.Тасыровқа 1947 жылы соғыстан соң тапсырылды. Бүгінде ардагер көптеген орден жә­не медальдардың иегері, Сырдария ау­да­нының «Құрметті азаматы». Батагөй қартқа түрлі мерейтойларында бірнеше рет автокөлік кілті табыс етілген. 

Қазыналы қария өз таңдауын жасағаннан кейін ақ батасын беріп, сәттілік тіледі.

Айта кетейік, өңірде 373 сайлау учаскесі және 482 934 сайлаушы бар.